Photo by Maria Orlova on Pexels.com

So is ons nou reeds by dag 336 sedert ons eerste familievergadering deur Pres Cyril Ramaphosa saamgeroep die lewens van elke Suid-Afrikaners onomkeerbaar verander het. Ek moet bely dat die dae en eerste weke wat gevolg het, was vol verwarring, verstomming en gelatenheid. Die omvang en impak van die Covid pandemie was vir my om skielik binne Deon Meyer se Koors samelewing in te stap of een van die Mad Max flieks. Surrealisties. Toe kom die hamerhoue – ons besighede staan toe, geen kaggels en braais word verkoop nie. Oornag. Tjoef. Net so. Het die bank, die polismense,die mediese fonds, die finansieringmesne hulle eise op ons sakke gestop – nee ou katta. Telefoonterrorisme is bedryf. Mens het naderhand nie antwoord nie. Hooploos.

Ek lees vanmore Michelle van Breda se redakteursbrief in die nuutste Sarie. Waarlik ek stem saam met haar. 2021 is eintlik net 2020 Deel 2, met bietjie hoop by.

Daar is steeds die angs oor Covid, mense word siek, mense gaan dood. Maar 82% van gevalle ervaar mense slegs matige simptome en herstel. ‘n Vriend van Bab se bloed moes onlangs getoets word, en dit wys hy het wel Covid gehad, hy kan om die dood toe nie vertel waar en wanneer nie. Miskien was die verkouerigheid ‘n ruk gelede.

Ons gesin is deur 336 dae se wroeg op finanisiële gebied. In ‘n hoek geverf en toe kry ons die bakstene agter ons rûe losgewikkel. Ons besluit om die groot karoohuis wat ons al jare verhuur te verkoop. Ons gastehuisdroom laat vaar. Binne dae kry ons ‘n aanbod wat by ons verkoopprys uitkom. Binne ‘n maand is die transaksie afgehandel. Die polismense, die bank is almal gelukkig en ons kan voorraad vir die Lekkerwinkel aankoop. Soos ek hier sit en skrywe word ‘n kosbare vrag kaggels en braais afgelaai. Genade, genade!

My maat Hester kontak my. Vra wat het Johannes 14 met pap en kool te make. Ek beduie, danksy my noue band met Eli, dat dit ‘n township liefdewoord vir kool is, en Johanne14 heet. Dit verwys heen na die Zioniste kerk wat baie geheg is aan Johannes14:1 “Julle moet nie ontsteld wees nie. Glo in God; glo ook in My.” Solank jy kool het, is daar kos in die huis. Jy kan slaai maak, jy kan dit stoom, roerbraai, met aartappel maak en een kool maak klomp mae vol. Hoop en geloof.

Kyk net wat kan ons by mekaar in hierdie Suid-Afrika leer. Van hoop, genade en saamstaan. Oor die Radio speel Dr Victor se “Give me hope, Johanna.….” So by my kool!

Geloof so eenvoudig en asemsnakkkend. Dat die God van die skepping ons klein spikkeltjie mensdom so liefhet, dat ons Hom mag aanbid.

Die wonder van God se liefde vir ons, die wyse waarop elkeen van ons kan terug kyk en die ToeValLig is 10 000 kere waar Hy ons lewens gerig, gelei, gered het met sorg en liefde wat uit ‘n Vaderhart kom. Daarom sal ons vorentoe gaan, met hoop en Johanne 14 as dit moet.