Ons het jou en jou gesin gefaal

Lanklaas het ‘n foto my so ontstem. My sprakeloos gelaat.

Deur blou lug omraam op ‘n plakkershut se dak, ‘n polisieman desperaat grypend, en ‘n volwasse man in rubberstewels wat sy babadogtertjie aan haar voetjie, koppie weerloos na onder, deur die lug slinger.

Afgryslik

Dierlik

Woedend

Ondenkbaar.

In die foto is ons land vasgevang.

Weerlose arm mense, veral ons kinders word letterlik vir die wolwe gegooi. Hulle word die felste getref deur die onvermoë van ons verkose regering om na sy land en mense om te sien.

Ons polisie se onvermoë om te keer dat vroue en kinders, weerlose grysaards en armes van alle geslagte, daagliks verwoes en vertrap word.

Ons regeringsdepartemente wat vanweë korrupsie en staatskaping, niks doen om basiese behoeftes – ‘n dak oor jou kop, water, opvoeding – aan ons land se weerloses te bied nie.

Ons politici wat hierdie einste weerloses se koppe vol retoriek prop. Ja Juju en Andile, ek wys die vinger na julle. Julle was saam met die pa op die dak.

Ons kerke en nie-regeringsorganisasies. Ons wat in die naam van Christus kamtig daagliks Samaritane is. Ek wys vinger na julle wat basaars hou, afdakke vir karre bou op die parkeerterrein sodat gemeentelede nie na die diens in warm gebakte voertuie hoef te klim nie, in plaas van sopkombuise reël vir armes. Julle wat reken ‘n t- hemp sal kanker of vigs voorkom. Julle was saam op die dak.

Ek, en jy liewe leser, wat daagliks blameer en vinger wys, maar nie daadwerklik ons gewoontes en denke verander om van hierdie ‘n beter plek vir almal te maak nie. Ons was saam op die dak.

Ja, Suid-Afrika, ons het die ouers in hierdie situasie geplaas. Hulle plak want behuising is landwyd tot vyftien jaar agter. Die lys van onvermoë om die weerloses in ons land se lot te verander sal ons tot ewigheid besig hou. Liewe heimat, jy was op daardie dak.

Die pragtige kleuter, sekerlik ook nie haar ouers se enigste nie is fraai aangetrek. Denimbroekie, spierwit kousies en ‘n rooi hempie met wit kolletjies of is dit hartjies? Netjies en versorg. Sou sy haar pappa se hart se punt wees?

Die gereg daag op om hulle huis, hulle veilige hawe, af te breek. Hulle huis is toe op bybelse sand gebou. Die nood na beskutting so hoog dat hulle noodgedwonge die wet oortree. Die daaglikse geveg om oorlewing so aanhoudend, dat hulle, en duisende soos hulle, wetteloos moet seker maak dat self en geliefdes en ‘n handvol wêreldsgoed teen elemente – die natuur en menslike onheil- beskerm word.

Ek is ontsteld dat die pa besluit het om sy kosbare kindjie die die lug in te slinger. Tog wonder ek of die desperate man, met sy vrou wat hom aanhits om die kind as kollateraal te gebruik om hulle huis te red, nie soos Abraham met die mes in sy hand, opgekyk het vir ‘n wonderwerk nie. Desperaat vir uitkoms, maar vir dié pa was daar nie ‘n offerram nie. Want genade in Suid-Afrika is yl gesaai. Daar was nie uitkoms nie…en die ondenkbare gebeur.

Dankie Vader, daardie polisieman se hande was oop en sy arms sterk. Here, ek bid dat die ou kleine lyfie veilig en geborge sal wees. Maar Here, ek wil ook daardie pappa en mamma voor U voete kom neersit. U het lankal ons mensfoute vergewe. Gee hulle genade. Ek bid dat U ook ons, ons land, sy mense en leiers sal vergewe. Want dis ons, ons het hierdie gesin gefaal. Ons keer nie by die stembus, op die straathoek, by die werk, dat mense hulle kinders wil offer ter wille van oorlewing nie. Ek huil en smeek om U almagtige hulp en leiding. Amen.

Oggendgesprek

Vanoggend trek ek die Legend vurig vinnig uit die motorhuis. Ek is laat en dis 40km te perd om in die stat te gaan besigheid pleeg.

Dit het oornag 34mm gereën. Rots se nek is ekstra seer, die Schnauzer-boeties, Milo en Ringo en stoute Koda-Koos blerts in die kombuis, bejaarde Oscar die Yorkie weier om langs Rots uit die bed op te staan.

Die grondpad is 1.9km seepgladde modder. Gelukkig is dit al wat ek moet trotseer, tik ek op my dankabaarheidlysie af. Toe ek by die t-aansluiting op die ou N1 kom, staan ‘n vrou onder ‘n helderblou sambreel en ryloop. Die reën begin harder val. Ek stop en laai haar op. “More Mies,” groet sy. Die bakkie se kajuit ruik soos rooswater en Dawn lyfroom.  Ek groet terug en babbel oor die weer. “I don’t understand,” val sy my Afrikaanse relaas in die rede.

Haar naam is Marlene, ons gesels op Engels verder oor padveiligheid.  ‘n Taxi het pas oor dubbelsperstrepe by ‘n klomp voertuie verbygejaag. “Eish, they treat us like cattle,” sê Marlene. Ons gesels oor respek en sy vra my hoe lank ek motor bestuur. Al meer as veertig jaar. “Jo,” is al wat sy sê.

“My husband is looking for work,” kom die stelling. Ek vermoed sy aanvaar ons het ‘n plaas – die bakkie, die modder en algemene rigting waaruit ons paaie gekruis het.

“‘Skuus Marlene, ons bly op dierbare vriende se familieplaas, hulle is reeds in hulle aftreehuis in die veiligheidsoord. Ons boer nie. Ons werk in die stat.”

Ek  deel my hoop dat President Ramaphosa en onse regering tog ‘n plan sal maak, dat meer mense werk kry en regverdig behandel word. Ek kan net help met ‘n geleentheid om veilig by haar werkplek te kom.

“I hope he makes right,” sê Marlene.

Ek ook, suster, ek ook.

Sy vaar uit teenoor Zuma en veral Nkosasana Dlamini Zuma – wat nie met poletiek wil verder nie, maar net nou die dag het sy vir President wou staan. “She is a funny one,” kom dit links van my. Ek vertel vir my passasier van “The President’s Keepers” en Dlamini Zuma en die sigaret mafia.

“Mies, those illegal cigarettes. They are bad. I sold them and the police caught me with 20 boxes. I was sentenced for 13 years! 13 years. But I did it for my family, what could I do? How must we live? What must we eat?”

Ek sit met my bek vol tande. Wat sê ek nou? Het sy al 13 gesit?

“No, when parole was given to everybody but murderers and rapists, I was freed. I could not believe! But now I  clean houses. Those cigarettes are bad,” en sy stop die gesprek net daar.

Ek stop naby die taxihalte en sy hou R8 na my uit. Vir die rit. Ek sê nee dankie. Sy glimlag met haar mieliepit tande en blink oë.

“Siyabonga” – dankie.

Hamba kahle, Marlene. God seën jou.

Here, dankie dat ek Marlene kon beleef vanoggend. Dat ek kon hoor wat armoede en werkloosheid ‘n mens kan noop om te doen, selfs misdaad oorweeg. Dat ek vir haar taxigeld kon spaar. Ek het haar meer nodig gehad as sy vir my. Here vergewe my wanneer ek ongelukkig is oor klein, onbenullighede en klippies in my skoen.

 

iceberg words.JPG

Hierdie woorde hierbo gaan oor Afrikaans en die taal, maar dit is ook van toepassing op ons land en die pad waarop die nuwe president ons lei.

Die Iceberg foto, is een van my gelukkies wat my kameralens vasgevang het.

Baai tot later

…se mielie,sê ek.

definition-of-political-correctness

culture-wars

PC1 (1)

Polities korrek. Pfft. Se mielie.

Die onding kom al ver met die mensdom. Dit het ontstaan in die Sowjet-Unie na die Eerste Wêreldoorlog om presies te wees. Die Marxsiste het dit uitgedink. Het julle dit kon raai?

Hoor wat sê Joseph Stalin:”“Ideas are more powerful than guns. We would not let our enemies have guns, why should we let them have ideas.” 

Ene Bill Lind het in February 2000  in Accuracy in Academia  in “The Origins of Political Correctness” politieke korrektheid as kulturele Marxisme beskrywe. Hy noem dit die siekte van ons tyd, ‘n siekte van ideologie. Ons word lamgelê deur soveel moets en moenies, mensgemaakte reg en verkeerd, dat ons bang word om te praat, te sê of te dink.

Ons word geindoktrineer, nee, geboelie, om nie ander te affronteer nie. Daar is egter aartsmanipuleerders die wêreld deur wat met groot lawaai, boelietaktiek en gogga-maak-vir-baba-bang truuks mense soos skape in vrees en stilswye laat.

Ek huldig al jare saam met Rots die mening dat al die polities korrekte twak nog tot die samelewing se ondergang gaan lei. Dink nie ons is verkeerd nie.

Wanneer het ‘n ander se seksualiteit voorrang bo my keuse gekry? Waarom paradeer gewone, meerderhede hetroseksueles nie in hulle eie “straight and proud” optogte nie? Nee, net “gay and proud” mag – want hulle is so onderdruk. Bollie. Al die goed was van altyd af deel van die mensdom. Vertel my ‘n ander storie asseblief.

Hoekom is gestremd nou ook nie meer goed nie?  Waarom is arm nou voorheen benadeeld. Fok – daar was kreupeles en armes van die begin van die geskiedenis! Wat maak moderne mense se fisiese en ekonomiese gebreke nou skielik anders as al die geslagte voor ons?

Ons mag nou nie eers ons kinders met goeie siepsombraaiboud groot maak nie. Slapgatte in die skool en jou sawwe bure en selfs jou eie kind kan nou vir jou in kookwater laat beland!

Plek vir sterk opinies, ‘n goeie voorbeeld, en properse beginsels wat reeds eeue deurstaan het, is daar nie meer nie. Die Marxiste het hulle sin gekry.

“To learn who rules over you, simple find out who you are not allowed to criticize.”  Voltaire praat uit die geskiedenis steeds waar met ons.

Ek stem ook saam met Amerikaanse filosoof Terence McKenna: “It’s getting funnier because everybody’s categories are disintegrating, and the cult of political correctness dictates that we never point out that other people don’t make sense.”

‘n Artikel in die New York Times so paar jaar gelede noem polities korrektheid ‘n wrede aanslag  wat mens se gewete versmoor en ook geloof en oortuigings onderdruk. Dis net ‘n moderne wyse om teenstanders se monde te snoer soos die Sowjet-Unie dit in die 1920s gebruik het om mense wie nie in die kommumistiese partylyn wou loop nie, in die bek geruk tot gehoorsaamheid.

Laat mens dink.

Ek hou ook  van  John Michael se stelling: “The opposite of love isn’t hate, it’s fear.”  Politieke korrektheid vuur ons vrese aan! Dis tyd om op te hou pissies wees en om opreg en outentiek te lewe. Wees oortuig in jou standpunte en veg om jou stem te laat hoor. Dit sal nie noodwendig gewilde opinie wees nie, dit behels risiko’s en verg moed.

As ek egter so rondom my lees en luister, moet ons net leer opstaan, want daar is meer van ons “polities inkorrektes’, as wat ons dink.

 Lees gerus   Accuracy in Academia  titled “The Origins of Political Correctness” deur Bill Lind. Mr. Lind writes:

Where does all this stuff that you’ve heard about this morning – the victim feminism, the gay rights movement, the invented statistics, the rewritten history, the lies, the demands, all the rest of it – where does it come from? For the first time in our history, Americans have to be fearful of what they say, of what they write, and of what they think. They have to be afraid of using the wrong word, a word denounced as offensive or insensitive, or racist, sexist, or homophobic.

We have seen other countries, particularly in this century, where this has been the case. And we have always regarded them with a mixture of pity, and to be truthful, some amusement, because it has struck us as so strange that people would allow a situation to develop where they would be afraid of what words they used. But we now have this situation in this country. We have it primarily on college campuses, but it is spreading throughout the whole society. Were does it come from? What is it?

We call it “Political Correctness.”

 

__________________________________________________________________________________________

Om die inskrywings van verskillende bloggers in Lê-Jou-Eier te geniet of om self ‘n eier te kom lê wat ons kan uitbroei en grootmaak, klik op die paddatjie of die InLinkz skakel net daaronder:

http://www.inlinkz.com/new/view.php?id=762615

Vir die reëls van hierdie eier-boerdery, om raad te kry oor hoe om deel te neem en om elke week se aankondiging van die nuwe onderwerp te sien, besoek die volgende skakel by Dis Ekke. Onder hierdie kategorie, kyk na die blogposte Lê-Jou-Eier: Reëls (2017-08-22) en Lê-Jou-Eier: Hoe neem ek deel? (2017-08-22).

Hou links verby

Ek lees flussies die volgende raak:”Min mense gee werklik om, die res is net agies.” Dis harde, waar woorde. Die geveinsde belangstelling as daar ‘n storie is, ken baie  van ons alte goed.

Egskeiding, dood, siekte, skade, affairs, geweld, ongelukke, jou lotto meevaller en veral Ta Rapie se erfgeld laat vergete mense blitsig jou nommer onthou en skielik weer in jou handel en wandel belangstel.  Langverlore kennise is skielik in kontak. Familie met wie jy ‘n eon gelede laas gesels het, onthou skielik hoe om jou in die hande te kry.

Ek het ook al  self aan eie bas ervaar hoe, as jy met ‘n projek of in ‘n beroep presteer, daar twee goed gebeur en agies van verskillende foramaat tree na vore.

  • Eerstens is daar mense wat soos ‘n mot na ‘n kers, jou naby wil wees. Jou sukses laat hulle goed voel. Jaag enigsins aan of tree uit die kollig, dan is die mense ook terug in die skadus. Weg. Jy dink jy kan op mense reken, dan staan jy maar bedremmeld eenkant op jou eie. Vra maar die beroemdes wat soos Icarus neergeslaan het…
  • Tweede ding wat gebeur is die besef dat hoë bome lekker koel wind kan vang. Dis lekker daar bo, maar ai toggie net jammer van die aanhoudende, brandende, louwarm gepie grondlangs. Rerig irriterend, daais wat net misgun, wat nie self die moed het om voor te loop en te lei nie. Hulle wat jou nie rerig eers ken nie, maar beter weet. Pffft.

In alle geval, mens word gelukkig met tyd wys en versigtig.  Die min mense wat werklik tel is immers kwaliteitmense en lief vir jou al weet hulle alles van jou. Vrinne en familie met wie jy soos ‘n klein Gideonsbende die lewe op die ondermaanse deurtrap.

Agies hou links verby.

Vir my handvol liefiemense – ek laaik julle kwaai, dankie. Julle is pasgemaak vir my.

27173975_1659769564045736_6310413155767720424_o

 

 

 

Groet die Kersfees almal

 

gcx-africa-christmas-tree01

Hoe maak ons met soveel tale in #Lekker SA. Ons leer woord vir woord om in elf tale en vingertaal iets te sê.

So, in die gees van die tyd, kom ons leer twee frases: Seisoengroete en Geseënde Kersfees. Dan kan jy polities korrek of jouself wees. (Grappie)

--languages-south-africa

Watter is jou tale? Ons hier in die Limpopo moet ses van die elf onder die knie kry! (Ek het hulle in rooi gemerk)

English: Season’s Greetings     

IsiXhosa: Imibuliso Yelixesha Lonyaka

Afrikaans: Seisoengroete 

IsiNdebele: Izilokotho Ezihle Zamaholdeni

Sesotho: Ditakaletso tse Molemo

Northern Sotho: Ditumedišo tša Sehla sa Maikhutšo

Setswana: Ditumediso tsa setlha

Siswati: Tilokotfo letinhle kulesikhatsi semnyaka

Xitsonga: Mikateko ya Masiku yo Wisa                                

Tshivenda: Ni vhe na nwaha wavhu’di

 

Hier is Geseënde Kersfees:

English: Merry Christmas

Afrikaans: Gesëende Kersfees

IsiNdebele: Ukresimusi omnandi

Sesotho: Keresemese e monate

Northern Sotho: Mahlogonolo a Keresemose

Setswana: Masego a Keresemose

SiSwati: Khisimusi lomuhle

Xitsonga: A ku ve Khisimusi lerinene

Tshivenda: D’uvha la mabebo a Murena l’avhudi

IsiXhosa: Krisimesi emnandi

 

En hier is die vingertaal

sign language

Wit truie en asemhaal

sngrywoman

Vanoggend se dagoordenking laat ons lees uit Psalm 63, en Stephan Joubert vertel dat ons daarteen moet waak om nie ons Springbokkleure in kerm en kla te verwerf en die ou truitjie tot skifsels dra nie. Te lekker blindesambok die woorde vir ons.

Ons hoort aan ‘n wenspan beduie die wyse man.  Ons hempies sneeuwit van vergifnis en ewige liefde. Whoohoo, kleinbekeer my hart warm. Ons pak heel vrolik die pad dorp toe om ons deel vir die zupta-ekonomie en SARS te pleeg. Entrepreneurskap is rerig nie meer grappies nie.

As jy die nou pad kies, dan knyp die kontantbetalers (lees: kom ons vergeet van BTW) en afslagsoekers gedurig aan jou siel. Vergeet goeie diens, etiek, morele waardes. Nee, almal mag eise stel, net nie jy nie. Dit tel niks dat jou besigheid aan sewe arm gesinne ‘n heenkome bied en kos op hulle tafels hou nie. Geen afslag of krediet vir jou nie ou katta, betaal, betaal… Oeps, daar is die Spingboktrui in kla amper oor my kop.

Man, ek het nog nie eens koffie gemaak nie, toe storm hier ‘n kliënt in wat vier maande gelede vir ‘n braai betaal het. Rots onthou nie dadelik hoe ons reëlings met lewering  werk nie, en ons vra dat die man net vir ons kans gee om die faktuur en so op te soek, ons sal bel om verder te reël.

Flippit, sê nou daar is by die verkeerde adres afgelaai, pieker ek by myself.  Ek soek vervaard deur dokumente en verlig kom ons agter hulle wou eers klaar bou voor die braai installeer word. Ek wil nog na die telefoon reik toe die deurklokkie lui. Die braai ou se vrou storm in.

“Ek vat julle polisie toe!”

Die woede en onredelikheid voes die vrou se perfek gegrimeerde gesig op. Daar is niks mooi hier nie.

Ons sneeuwit truie rafel so om ons lywe uit, dit kos wange byt om om nie daai Springboktrui oor die kop te trek en ook vuil te speel nie. Ek bid vir krag en kalmte terwyl die woede woorde oor ons spoel en deur die winkel skal.

Nooit in my lewe gedink dat ek vir ‘n kos-op-my-bord sal skreeu: “Hou nou dadelik op – haal asem!”

Klaarblyklik is Mevrou nie gewoond dat iemand haar vasvat nie. Sy hap soos ‘n vissie uit die dam. Haar woorde droog op. Of so dink ek. Met die volgende asemteug trek sy weer los.

“Hou op! Haal wragtag nou asem!”

Ek praat mooi en ferm. Eindelik kom ons besoeker tot bedaring en ons kan verduidelik. Ons skud blad en sy storm weer by die deur uit. Die motorbande sal vervang moet word.

Ek sit en skrywe die oggend uit my uit en is dankbaar dat my woedejare verby is. Hierdie tierwyfie se naels is stomper, die helleveeg se rooi kapsel is met grys getemper. Moet net nie met my Rots en Bab sukkel nie, dan kan ek lekker vurig vies word.

Dankie Vader vir meer behoefte aan die wit trui wat vir altyd gedra kan word. Dankie, dankie. Ag siestog, laat die kwaai vrou nie te veel hardepad moet loop om vrede met haarself te vind nie. Sela.

F..,f.. en f..kietog

(Foto: Rational Standard se blog)

Vandag is ek vuriglik en sooibranderig klaar bekgehou, na ek sedert Maandagaand my uiterste bes probeer het om nie onbedaarlik aan die gil te gaan nie. Ek gaan nie roem dat ek alwetend is nie, maar wel dat ek van ouskool joernalistiek hou, omdat ek self toe ek klein was – met mooi tieties en my eie tande – die voorreg gehad het om ‘n gemeenskapskoerant joernalis te wees.

Jy het wie, wat, waar, wanneer en hoekom in jou berigte geantwoord. Jy het feitgebasseerde nuus aan jou redakteur voorgelê. Dit was nie net die grootkoerant (dagblaaie) wat ‘n scoop gejaag het nie.

Jy moes ongewilde vrae by die stadsraad vra, jy moes die spietkop wat oorkant die straat bly en aan omkopery skuldig bevind is, se foto buit die hof neem – dit was ‘n skande. Jy het geweet dis hy en sy tjomme wat jou Pirenese berghond vergiftig het, dit was hy wat spykers in jou oprit gegooi het. Dit was jou werk, jy was trots daarop en buig of bars, jy het geskryf wat waar is. Die hel het jou gehaal as die redakteur feite nagegaan het en jou weergawe is krom.

Behalwe nou as dit by poletieks gekom het – daai is vir jou via jou baas met ‘n lepel gevoer, en ja, ek kon nie lokasie toe gaan nie. Hoe hang die ou onderrokkie uit, Lekkervurig. Ons het ook maar in Lalaland gebly en in daai opsig geskryf wat opgedis is. F..nou is ek sommer weer ontsteld oor die nalatenskap waaraan ons nimmer klaar gaan betaal nie. Daar, beskou nou maar dit as my bevoorregte gebieg oor my verlede.

Ek wil egter my verstout om te sê dat daar meer versigtig met mense en nuus omgegaan is as vandag. Dit voel vir my so baie keer dat ‘n beleid neergelê word, en buig of bars, nuusberriggewing sal ‘n narratief volg, f..die ware storie!

Die gewraakte ou SA-vlag foto’s en die brand van die nuwe landsvlag foto is Maandag deur ‘n joernalis en die leier van die BLF getwiet. Die flippen foto’s dateer uit 2010 en vroeër. Toe hulle uitgewys word…niks. Geen gevolge, want die narratief… (Lees die Rational Standard se blog hieronder deur op die skakel te kliek.)

Daar het Maandag min verkeerd gegaan, nie dat ek met die hele aksie en bedoelinge saamgestem het nie. Feit is en bly oral in ons land word daagliks 52 mense vermoor, onder wie meestal landbouers van alle rasse, kinders, bejaardes en vroue. Al hierdie vermoordes wat ek hier lys het volgens my een ding in gemeen – weerloosheid.

Ons moet weerbaar wees. Ons moet leer om in ons klein bestek met almal om ons saam te staan. Ons moet moedig en braaf wees, ons moet self dink en doen. Maar onthou, dis maar my mening. As jy anders voel – dis ‘n demokrasie ons mag verskil, moet net nie op my skreeu nie.

MAAR ek wil wel weet:

  • Wat het mense gedink om in die middel van een van die gevaarlikste stukke pad hulle punt te wil maak. Die steenkoollorries regeer op die Hoëveld se paaie. Ons protesteerder weet dit. So die ploegery deur die karre – moedswilligheid aan beide kante. Punt. Daar is niks rassisties aan roekelose bestuur en gladde bande en bo die spoedgrens ry nie. Dit lê voor die deur van ons Prez en sy trawante. Danksy hulle voorbeeld en ondermyniing van die wet en orde in ons mooi land, maak elkeen soos hy of sy wil. Wie gee dan om!
  • Mense wat moedswillig wel die ou landsvlag geswaai het en moedswillig net die stem gesing het: Maats, al wat julle reggekry het is om soos BLF en die EFF en die Prez te wees. “Beware of the verbose few” word daar wys in die rooitaal gewaarsku. Julle het in die hande gespeel van diegene wat Afrikaners en Boere wil stereotipeer as rassiste wat hunker na die goeie ou dae van apartheid. Eish.
  • Omdat daar nêrens onluste uitgebreek het nie, omdat niemand gedood is of aangerand is nie, omdat eiendomme nie beskadig is nie, het almal wat ‘n grief teen Maandag se aksie het, te heerlik en gou die vals nuus as waar versprei – want daar was niks anders nie.
  • Dit is so handig dat ons vriend CR ook die vals nuus gebruik het om almal verder op hul plek te hou, ons witgeit verder te verguis. Dit is te lekker om ‘n sondebok te hê as daar soveel toortse op jou en mede-leiers se etiek en optrede geskyn word.
  • Wat die arrestasies van optog-organiseerders betref, as die wet oortree is en toestemming is nie verkry nie, dan moet die gevolge gedra word. Ons moet dit hanteer – ons ken nie van massa-optrede nie. Moenie nou heksejag en viktimisering skreeu nie. Daar word gegrom om mense terug gate toe te jaag.  Onthou die werkende middelklas – meeste van ons is hier te vind, is deel van die 5miljoen getakseerdes wat moet sorg dat 45 miljoen toelaes, pensoioene en Nkandlas kry. Dis maar my teorie, ek is maar polities naïef. Vergewe my as ek verkeerd dink.
  • Omdat ons senuagtig is, en nie weet om al hierdie eerstes te hanteer nie, en daar vir ons ingeprent word dat die boere aspris vermoor word, is die Vuisboek en Whatsapp vol twak. F..kit, ons word beloer en beluister. Whaha. Daar is nie tyd of geld vir sulke spioenasie nie – daar is te veel om te staats-kaap. Die soustrein moet leeg voor hy tot stilstand gebring word! Hulle sal anderdag eers oor klein mensies kommer. Solank jy net bang en versigtig bly en jou taks betaal.
  • Oor die aspris moor wil ek my geensins uitlaat nie, want ‘n storie in die styl van Deon Meyer se Koors hardloop alreeds deur my gedagtes en ek het anner goed om vir Janie Skryf te voltooi.

Tata, en blaas af daai kuite.  Hierdie is maar gedagtes in my kop.

Soos Bantu Holomisa tydens die mosie van wantroue probeerslag gesê het: “The history we write today – forms the future of our country.” Kom ons maak geskiedenis deur vir waarheid te staan. Sela.

https://rationalstandard.com/fake-news-blackmonday/

 

 

 

Nuwe moed

Ek lees oral vandag dat ons in Suid Afrika sal moed aan die dag sal moet lê. Ons sal braaf genoeg moet wees om ou sienswyses en oortuigings te laat gaan. Braaf genoeg moet wees om uit te reik na mense wat anders as jy dink en voel.

“Abandoned by their politicians South Africans need to take charge of their own security.” Die lees ek raak in ‘n artikel oor #SwartMaandag. Dit dui vir my daarop dat ons brawer as braaf sal moet wees om ons land se toekoms vir alle mense te verseker.

Lees self: http://www.news24.com/Analysis/10-questions-about-blackmonday-answered-20171101

Net Ek bring my op die spoor van ‘n skrywer/digter/blogger: I wrote this for you 

Hier skryf hy sowaar vir ons almal ‘n waarheid:

There is no bravery in a gun.

Brave is saying no to the comfort that kills you.

There is no bravery in a fist.

Brave is singing Kumbaya softly to a screaming baby.

There is no bravery in a flag.

Brave is holding onto the air itself to stop yourself from falling into yourself.

There is no bravery in a crowd.

Brave is knowing who you are, even when everyone else doesn’t.

There is no bravery when it’s easy.

Brave is carrying on and on, and looking and finding all the angles and all the keys, and turning every single one.

There is no bravery in bright light.

Brave is fighting the sun itself for the right words to talk yourself off the ledge.

There is no bravery in hurt.

Your bravery is kneeling on the ground.

In the end, your bravery is living.

Iain S. Thomas

http://www.iwrotethisforyou.me/2017/10/the-living-and-brave.html

Haal die was uit jou ore en luister

My Rots het eenkeer op ‘n inkopielys die volgende neergepen:”Ons luister om te antwoord, nie om te verstaan nie.” Hy het dit iewers op die draadloos gehoor.

Nou die is baie waar op die oomblik, met die plaasmoorde-emosies en so aan. Ons wil nie hoor nie, ons wil vertel. Ons is almal moedeloos, seer, kwaad, bang – ons ore is bot toe. Ons lyk soos Shrek met sulke groen verstopsels wat by on ore uitsteek. Horende doof en siende blind vir enige opinie anders as ons eie.

Hierdie dae is vol emosie en ‘n mens sal seker moet versigtig trap. Soos ‘n trapsuutjies. Die swart t-hemp aksie het ‘n liederlike slaggat geword. Tipies Suid-Afrika, stig ons so graag groepies en elkeen glo hulle  interpretasie en geloofsuitkyk is reg. Eish.

Ek sit verslae nadat ek met aandag Heinz Winkler van Idols faam, en wat my aanbetref ‘n ordentlike en diep-gelowige mens, se 20-minute oproep oor die netelige situasie uitgeluister het. Hy het bloot gewaag om sy mening te lug en klomp ongemaklike stellings te maak.

Genugtig, julle moet lees wat kamtige Kristenmense vir die Heinz-kind toesnou. Ek wil net een vraag vra: Bid julle met daai bekke? Jo, die hemel help ons met sulke kerkmense.

Wat my opgeval het is dat Heinz  smeek dat die swart t-hemp aksie nie beperk word tot ‘n ras of kultuur nie – ek stem volmondig met hom saam. Want sien – my en my kinders se werkers kom vra by ons hulp teen dieselfde wrede misdadigheid wat op ons plase gebeur – marteling, verkragting, diefstal, moord.

Skreeu op my as jy wil dat ek niks weet nie. Verrassing: Ons woon op ‘n plaas, glo my ons weet hoe weerloos ons is en ons besef ons staan op die rand van die statistiek poel.

Tweedens het Heinz die vraag gevra wat doen ons om ons onmiddelike omgewing te beïnvloed, nie die hele wêreld nie, net jou kring van invloed en impak. Hoeveel van ons ken ons werkers se blyplek, was al daar, help met skoolgeld, maak middagetes want jy weet hulle staan al 04h00 op – wanneer sal hulle kosmaaktyd kry? Die lys is lank van goed wat wesenlike verskille kan maak. Ook by arm mense van die wit plakkersamp of veilige hawe – was jy al daar? Het jy al die wit van die oë van ‘n mens in nood gesien? Was jy al so naby dat jy dit kan voel en ruik? Dis die doen wat ons land nodig het.

Die hou op die borskas van stiksieniges het Heinz goed geplant – want hierby is daar nie verbykomkans nie. Hy vra: “Wie is jy?”

Ek verstout my dat meeste van ons antwoord So-en-so, Wit, Afrikaanssprekend.

Verkeerde antwoord!

Ons is God se kinders eerste, en in die jong man se woorde, “dan eers is ons deur lotsbestemming deur God bepaal, die velkleur en kultuur waarin ons ons bevind. En daar is verskeie velkleure en kulture in hiedie Suid-Afrika saam. Geweld, swak diens, korrupsie – daai goed  het ‘n impak op ons almal.

As ons geloof in God bely – moet ons wat ore het om te hoor beslis anders optree en reageer op oproepe om aan aksies deel te neem tot uitsluiting van ons naaste. Ja, ons naaste wat ons so lief soos onsself moet hê, al lyk hulle nie soos ons nie en al maak hulle nie soos ons nie. As almal, nie net wit Afrikaanssprekende Suid-Afrikaners gaan swart t-hemde dra, dan sal ek juig. Dan is die boodskap Suid-Afrika se mense is gatvol. Suid-Afrika se mense wil verandering sien.

Maar omdat ek  belowe het ek sal luister, wil ek ook sê Sophia Kapp ek hoor jou. Dit is ‘n waarlik vry wêreld. Ons moet maar in hierdie chaos met mekaar rekening hou en uithou.  Jans Rautenbach het ook sy eie verkeersplanne. Lees maar self.

Kyk wat  het ‘n Zoeloe gemeenskap vanoggend  gedoen om hulle ongelukkigheid oor plaasmoorde (ja, ‘n wit boer se moord het hulle tot aksie gedwing), moord en misdadigheid te demonstreer.

Ek en al my mense gaan Maandag swartbandjies dra – ons rou oor plaasmoorde, verkragtings, kindermolestering, eie-geregtigheid, ag sommer alles wat seermaak in ons baie siek Suid-Afrika. Maar ons gaan ook al hoe meer vir  mekaar omgee en luister as iemand praat.

Tata en blaas af jou kuite…en doen wat die Gees jou lei om te doen en onthou om te luister!

 

The community members of Zwathi, which falls under Ward 4 of AbaQulusi Municipality took to Gluckstadt Police Station to voice their concerns over the rising crime rate in the area. Picture: Vryheid Herald

Lees meer hier: https://citizen.co.za/news/south-africa/1520431/black-community-members-march-against-killing-of-white-farmers/

 

 

 

 

 

 

Meer as ‘n swart t-hemp dra is nodig

Nou wat hierna volg, gaan my seker ‘n klomp aanhangers en vriende kos. As mens moet, dan moet jy.

Blogland en Vuisboek is vol swart plakkers. Ons moet nou swart dra om ons boere teen plaasmoorde te help en ook om dit te voorkom. Ek het nooit geweet hoe plakkers en t-hemde sulke goed voorkom nie.

Onthou jy daardie foto van daardie kind wat sit, hopeloos van hongerte uitgeteer, en die aasvoël wat sit en wag dat die kind moet doodgaan – kitskos. Julle ken mos daai foto? Of nie:

The vulture and the little girl(The vulture and the little girl is a noted photograph by Kevin Carter which was sold to and appeared (for the first time) in The New York Times on 26 March 1993. It is a photograph of a frail famine-stricken girl collapsed in the foreground with a vulture eyeing her from nearby. She was reported to be attempting to reach a United Nations feeding center in Ayod, South Sudan sometime in March 1993)

Verbeel jou iewers in ‘n regeringsagterkamer is ‘n langtermynplan bewimpel wat soos volg lyk: Ons is nou die arme so arm as moontlik. Hoe hongerder almal raak, hoe minder is lewens werd. Ons raak ontslae van hordes mense deur hongersnood te bewerkstellig en waterbronne nie te versorg nie. Dan kan ons land in die nabye toekoms heel moontlik soos iets uit Deon Meyer se Koors lyk, of soos die foto.

Sê nou, in hierdie dae van korrupsie, magbeheptheid en anargie, die langtermynspel van ons regering se gierigaards is, om soos in tye van ouds tydens die Ierse Aartappel hongersnood en ook die Bengaalse Rys hongersnood (hulle is dood van honger terwyl hulle rys moes oes), kos en water min genoeg te maak om van ‘n grootte gros van die bevolking – lees die armstes van die armes – ontslae te raak. Rykes en rykdom bly versorg agter heinings en beskut deur veiligheidswagt en die massas in landelike gebiede sit en vergaan van die honger. ‘n Oorlog oor honger en waterskaarste. Dit maak my bang en ek dink nie dit is die raamwerk vir ‘n distopiese roman wat ek beskryf nie. Eendag is nou-nou.

Dit is maklik om oortuig te wees van ‘n sinistere plan met die moorde oral. Destabilisering van die landbou beteken mense gaan honger raak in die toekoms. Minder, duurder kos ons voorland. Oor die onbekwame bestuur van hulpbronne, veral water, wil ek nie eers uitwy nie. Maar ek weet darem nie – kan sulke bose planne gesmee word as al wat op die agenda selfverryking en eiebelang is? Het hulle tyd om sulke goed uit te dink?

Die warrel denke begin toe gister met ‘n betraande Vuisboek video van ‘n vriend van die vermoorde Klapmuts boer. Al dra jy net ‘n swart t-hemp, pleit die stukkende man. Ek sluk swaar aan die knop in my keel, en deel sy dankbaarheid om ‘n nuwe dag saam met geliefdes te geniet. Die Jordaan gesin van Klapmuts sal egter nooit weer die voorreg hê nie.

Oral is foto’s van die verslae seun wat sy ma omhels, die bloedige gang. Ons almal kyk – nes die bleddie bloeddorstige Romeine. My binneste brand rooi van ergerlikheid. Hier op ons buurdorp is ‘n 81-jarige vrou gister in haar aftreeoord woonstel vermoor. ‘n Jong 21-jarige wildsplaasbestuurder is koelbloedig afgemaai.

Ek weet ons voel oorweldig. Maar wragtig wat gaan ‘n t-hemp verskil maak? Ons moet kers opsteek by die vryheidsvegters van weleer – hulle het in massa die land tot stilstand gebring. Nie Miljoene op ‘n keer nie, wel groepe oral.

As elke Landbou-unie se lede elke dorp se hoofstraat betrek saam met dorpsmense en strate vol parkeer en al die tannies en kinders trek dan ook swart t-hemde aan en toi-toi en op elke dorp word ‘n memorandum aan die plaaslike polisiehoof oorhandig, en ons raas en lawaai vir so ruk daarna en gee hulle dan ‘n redelike kans om ‘n plan te maak, en as hulle nie iets doen nie, dan maak ons almal weer so. Ons moet petisie, ons moet saam staan. Ons moet saam….ons moet….saam. Maar ons weet nie hoe nie. (Lees naskrif hieronder ivm Maandag 30 Oktober se swart t-hemde…..)

Dis ‘n toekomsvisie van die onmoontlike soort. Ons ken nie van saam staan nie. Sosiale media is soos ‘n sus-jou-gewete-beeldpoets-pleistertjie vir jouself, om ander te wys jy gee om. ‘n Swart t-hemp gaan nie hierdie distopiese toekomsblik verhoed of omkeer nie. Vuisboek profiele en t-hemde om bewussyn te skep, daai vlieër se stert is af. Hy sal nimmer vlieg. Om smse en whatsapps rond te stuur – hou net die netwerke ryk, dit gaan nie een lewe red nie. Fokkit, rol liewer jou moue op en reël ‘n toi-toi of massavergadering. Gaan skreeu op die burgemeester of iets.

Oor bid wil ek nie praat nie, oor hulp van buite….pffft! Oukei, ek sal kalmeer. Kom ons luister eerder na die stemme van rede.

Ons moet eerder saam met Susan Coetzer so maak: “Daarom plaas ek my hande op my hart en vra ek Hom om my steeds ‘n sagte hart van vlees te gee om oral waar ek gaan nuwe vriendskappe te probeer inisieer oor die gapings. Om brue van hoop te bou. Om Sy Naam ontwil. As jy nie ‘n standvastige leier met integriteit ken nie, word jy dan een in jou klein invloedsfeer. Elke bietjie lig help. Ons het baie meer goddelike leiers nodig om saam ‘n nuwe hart vir hierdie land te vorm.”

Ook stem ek met hierdie saam: “What is really required is people willing to stand up for what they know to be right, backed up by evidence, and more importantly, a sense of right and wrong. People willing to go into their communities (luckily, South Africans tend to be social people) and stand up for the individual. I can make no guarantees that we will ever achieve true freedom here but I know for a fact that if we all stand on the sidelines waiting for someone to do the work for us, the battle is already lost. So, stand up for liberty, in your workplaces, your social circles and your schools. The information is out there, particularly, I’ve found FEE useful for getting ideas about the effects of government policy on economic liberties, the Mises Institute is my go-to for public domain digital material on classical liberalism and liberty, and the FMF is where you can get detailed discussions on issues of liberty in the SA context.” – Mpiyakhe Dhlamini

Daar is reeds in Graaff-Reinet ‘n aksie aan die gang om ons slapende polisie wakker te skud…maar dis een gemeenskap.

https://www.graaffreinetadvertiser.com/News/Article/General/concerned-residents-hand-over-petition-20171025

NS. Kersie op die skuinskoek van stukkende Suid-Afrika – ‘n Whatsapp boodskap doen die rondte dat “Miskien het hy dit uit onkunde gedoen, maar ons moenie vir die swart t-hemp man luister nie! Dis Halloween op 31 Oktober – die swart t-hemp ding gaan ons almal duiwelsaanbidders maak. F.. my pienk. Rêrig? Ernstig?

Luister maar na ander stemme – en kry daai blink gedagte wat ons nou drasties kortkom om werklik iets in ons mooi land te laat verander….