Ag, salig

Lekker lui op die waterval stoep. Dis warm en winderig en ons koop die tyd uit. Koel Campari en Soda met bitters en vars ment. Blokraai en Nat King Cole fluweel die eter in.

So vier ons die dag. Soos Bab sê “‘n lekker Sondagmaandag.” Nie meer ontbyt of middagete is amper reg. Ja, Rots maak kos onder die sambreel op sy mobiele betroubare braai, en hy braai en hy braai…lekkervurig.

Mooi ware relaas oor Pretville

dinerTowerinne, ons het soveel tydens ons besoek aan Una se Hartebeespoort belewe, dat ons skoon verby Pretville is. Dis ons eie Suid-Afrikaanse filmstel, ala Hollywood! ‘n Blogger, Rouxné van der Westhuizen, wie ek volg het ‘n pragtige stuk oor die unieke plek, en Hartebeespoort geskrywe. Moet dit deel. Lekker lees.

Ha… Ha… Hartbees-poortdam!

______________________________________________________________________________________

Volg die virtuele verhaal van die Broodbus hier:

http://www.inlinkz.com/new/view.php?id=797928

 

 

 

Broodina breekslag

prudish woman

Na ons aandjie op die barge oppie dam, het ons klompie Towerinne die volgende oggend luilekker opgestaan en reggemaak vir ons laaste ure saam met die nimlike Una in haar geliefde Harties. Sy het ons belowe van kaas en olifante en natuurlik sou ons kans kry om haar Bali winkel te gaan leegkoop.

Oor ontbyt is dit toe dat ons klomp Towerinne met skok mos lees hoe ene Broodina Barber, die Kromkoerant se selfaangestelde sedebewaker sou ons gou agterkom, ons private pret op die barge sommer saam met arme Hia de Sint, verslaggewer aan boord, deur die modder sleep.

As daar nou iets is wat my olelkoors gee, is dit mense wat onder die vaandel van puriteinisme dit hulle lewenstaak maak om die vinger en sedeboek heeltyd onder ander mense se neuse te vryf. Veral as mense pret het.

Ons sit ‘n oomblik tjoepstil van skok en verbasing. My oog val op die Kromkoerant se kontaklys. Vis de Arend. My onthoulaaitjie gemerk joernalisdae vlieg oop. Vis, van alle mense. Hier in Harties, en nogal Kromkoerant se redakteur. Hy sal nooit ‘n ou liefde so liederlik laat behandel nie. Ek verskoon my uit die stil geselskap en maak ‘n oproep.

Vis is uiteraard verbaas en verheug om na al die jare van my te hoor. Ek val sommer met die deur in die huis en vra of hy feite in Broodina se verslag nagegaan het. Hy stotter en stamel, en verduidelik dat Broodina se familie ‘n aandeel in die blaadjie het, en dat sy eintlik ‘n administratiewe pos het, maar haarself as verslaggeefster van damsake en plaaslike morele standaarde aangestel het. Hy is woedend, maar ontknater. Wat maak jy as die baas se oujongnooi suster haarself aanstel. Ek is sommer hartseerkwaad dat ‘n ou liefde so melkdermpie uitgedraai het.

“Vis, jy sorg dat Broodina vanoggend om 10h00 die Van Gaalen Kaasmakerij besoek – sit haar op ons spoor. Ons is nog lank nie weg uit Harties nie. Dan moet sy ook daarna ons na die Elephant Sanctuary volg. Sê vir haar sy het nog nie die hele storie van die wilde groep vroue nie.”  Hy stem stotterend in. My lekkervurige humeur gee hom ook nie veel kans nie.

“Kom Towerinne, ons het nog pret om te hê,” probeer Una ons opvrolik. Ek sleep vir Perdybtytjie eenkant en vertel haar van my plan met Broodina Barber.  Sy is sommer dadelik vuur en vlam. Ons klim saam met ons bedrukte maats op die groen bus. Toorts lig die gemoedere met haar kitaar en FAK-buskomposisies. Gou sing ons vrolik. Dis hoe Towerinne rol.

vgaalen

Ek was maar huiwerig om die Kaasmakery te besoek, daar is maar so-so resensies oor kos en diens. Maar was ek verbaas.  In 1990 het  Annelies van Gaalen  van Nederland immigreer en haar in  Skeerpoort, ‘n klein gemeenskap by Hartebeespoortdam kom vestig.  Hier begin sy in Hollandse tradisie kaas maak.  Haar Boerenkaas het gewild geword, en teen 1994 is Van Gaalen Kaasmakerij begin. Vandag is dit nog grotendeels ‘n kaasmakery, maar daar is ‘n restaurant, onthaalplek, plaasdierepret vir kinders en fietsryroetes vir die meer sportiewes. Moet ook nie van piekniek op die rivieroewer vergeet nie.

Ons is rustig besig om meer van kaas te leer en te proe, toe ek ‘n suurknol uit die hoek van my oog gewaar. Omdat dit ‘n weeksdag is, is ons die enigste besoekers. Una het die toer vir ons gereël. Ek stamp vir Perdebytjie in die ribbes. “Moenie kyk nie, Broodina is hier,” fluister ek.

Ons twee drentel stil weg van die groeptoer, winkel toe. Hulle verkoop proe-kasies, so afsonderlik toegedraai. Ons kies bokmelkkaas – bloubeaard beleë. Ek giggel. “Perdebytjie, weet jy hoe bedompig ruik so kasie in ‘n klein spasie? My kind het jare gelede op ‘n Roete 62 toer so ‘n kasie in die kar oopgemaak. Rots het nog nooit so vinnig remme aangeslaan nie!” Deel een van ons plan vir Broodina is in plek. Stink kaas.

Ons toer klaar met die ou aasvoël heel skynheilig belangstellend net so agter ons.

 

Gou is ons onderweg na die Elephant Sanctuary . Arme VirgoC, sy het net stiller en stiller geraak. So bang soos ander mense vir gediertes is, is haar vrees vir olifante epies. Ons het ons hande vol met haar gehad dat ons nie vertrap sou word nie. Om haar aandag af te lei, laat Perdeby haar in op ons Broodina-breekplan. Sy vergeet skoon van haar vrese.

Die Sanctuary bied interaksie met die olifante. Jy kan ‘n olifnt aan sy slurp rondlei!  Daar is ook ritte op die kolosse se rûe vir die braaf van hart.

ollie2ollieollie4ollie3

Amarula, Khumba, Mosadi en Mvusi word in ‘n boma aan ons voorgestel. Dit was wonderlik om die band tussen die reuse en hule hanteerders te aanskou.  My binneste het gebewe toe ek opkyk  in Khumba die matriarg se groot sagte oog my eie refleksie raaksien. Asemsnakkend stil toe sy met haar slurp saggies aan my ruik. Dit was ‘n belewenis toe sy haar slup om my hand krul, en die hanteerder vir my saggies sê ek kan stap, die kollos sal volg. Sjoe!  Ek is oortuig elkeen van die Towerinne het dieselfde gevoel.

Ons is vertel hoe lief sy vir water is, en baie lief is vir modderbaddens. Ek vra toe vir die hanteerder of  daar so poel naby is. Hy beduie ja, ons loop soontoe. Dis nou ons hele groep en kamma belangstellende Broodina agterna.  Tyd vir die tweede deel van Broodina breek om in werking gestel te word. (Onthou die kasies wat ons gekoop het.)

Amarula, Khumba, Mosadi en Mvusi is dors en stap na die watergat. Onder Perdybytjie se aanvoer, word ons so geposisioneer dat ons so skuins voor die watergat staan vir ‘n onthou foto. Ons hits vir Broodina aan om saam met ons te poseer. Sy het dan namens die koerant soveel tyd saam met ons toergroep spandeer. Sy staan strammerig nader en oorhandig teësinnig haar kamera skouersak aan VirgoC om vir die hanteerder aan te gee. Dis toe dat die stink proekasies oopgebreek in die sak gesit word. So ongesiens soos gesoute sakkerollers.

Intussen het die olifante begin baljaar. Khumba spat water oor haar rug. Mosadi trompetter en asof dit beplan is, spuit Temba en Amarula modderwater in ons rigting net toe die kamera kiek! Ons klomp het gelukkig tekkies en gemaklike klere aan en kan laat spaander, maar o weë, Broodina se blokhakke kon nie so fluks in die glyerige modder wegkom nie.

Kyk, wat uit daai vrou se mond gekom het, het g’n mens nog gehoor nie! Kamtig so behoudend, waar sou sy so leer praat het? Lekker dun moet die verfynde puriteinse nerf, nie wees nie!  Sy storm  daar weg, kamerasak onder die arm. Haar Unotjie spatter weg dat jy net stof sien staan. Perdybytjie, VirgoC en ekke lê van die lag. Broodina, sans haarknippe en skoene…vol modder. Hehe! Vatso katvis. (Excuse the pun…Barber, kon myself nie keer nie. Hehe)

Ek bel vir Vis, en vertel hom dat ons ‘n spesiale verslag oor ‘n insident by die Sanctuary het om te vertel. Onse Perdebytjie sal die volle verhaal met nagevolge stuur met volkleur foto’s.

“O, en Vis, jammer vir die klankie in die kamerasak…”

Kyk uit vir die berig in die volgende aflewering van die Kromkoerant. Dit sal sekerlik verskyn voor ons by Bondels op die plaas aankom.

NS. Baron Room ons paparazzo aka AJ, al kon ons nie die koerantmannetjie wat jou so gekwets het bykom nie, die Broodina breekslag was vir jou ook ter wille.  Hoop jy voel beter na ons met die krommes van Kromkoerant afgereken het. Al die Towerinne voel beter.

Volg die virtuele verhaal van die Broodbus hier:

http://www.inlinkz.com/new/view.php?id=797928

 

Watter # kies jy?

Lekkervurige-ekke wil dit duidelik stel dat ek geen teologiese of argeologiese opleiding het nie. Dat ek Die Woord van God, die Bybel van kleintyd as ‘n gunsteling metgesel en rigtingbepaler vir my kleingeloof en besluitneming beskou. Opreg, kinderlik. Oor die jare het ek geleer met die nodige skroom en baie gebede, en met onderskeiding meer kere my eie terkortkominge en menslikheid leer verstaan het, as enigeiets anders. My Paulus-doring-in-die-vlees is my oplvieënde geaardheid. ‘n Vreeslike sin vir reg en verkeerd. So,meermale sit ek my voet in ‘n ding en draai dit nog dwars ook. Soos Koos Doep sing: “elke afdraaipadjie ken ek, elke keer het ek verdwaal.” Maar dank Vader, ek is meermale skoppend en skreeuend aan my oor gevat en terug gehaal. Genade op genade. So liewe leser, bere dit nou iewers en laat my toe om iets op my hart hier uit te skrywe.

Dié is ‘n ompad storie op my hart gedruk.

Daar is die afgelope maand ‘n argeologiese ontdekking gemaak. Die oudste teken van oermense se teenwoordigheid en ontwikkeling is by ‘n plek in Suid Afrika gevind. Vista-ryke Blombosgrot in die Suid-Kaap is waar ‘n tekening wat alte veel  na ons moderne kommunikasiemiddel die hutsmerk # (hashtag) lyk, is opgegrawe. Die slim mense wat ons oer-herkoms bestudeer reken die stuk betekende gesteente is meer as 70 000 jaar ouer. Dis ouer as die vooreen oudste gesteente met gekrabbel op wat in Spanje ontdek is en aan die Neandertalman toegeskrywe word.

So beteken dit Homo Sapiens is slimmer as die Neanderthlman, wonder ek nou so by myself?  Is jy is bewus van die argument dat ware Afrikane kinders van Homo Sapiens is, en dat diegene meer lig van kleur mense glo Afrika as Homo Sapiens verlaat het, en in die Noordelike halfrond deur kontak en vermenging Neandertal gene te danke het vir ‘n ligter velkleur, en so aan ensovoorts.  (Gaan lees self oor die sienswyses by: https://www.livescience.com/28036-neanderthals-facts-about-our-extinct-human-relatives.html )

Kan jy nou in die rassistiese klimaat wat op sosiale media geskep word watter redenasies hierdie 70 000-jaar oue hutsmerk kan ontketen? O my vy! Maar dis nie die storie wat ek wil aanroer nie.

Terug by my gedagtegang.

Die moderne gebruik van die hutsmerk is meestal om seker te maak jy trek aandag op sosiale media. Sou jy #Blombosgrot, #DaarIsNiksNuutOnderDieSon, #Hutsmerk so aanteken, en iemand soek een van daardie woorde of woordstringe, sal ons vriendin Google seker maak jou geskribbel duik in ‘n soektog op. Die # is soos om jou hand in die grenslose klaskamer van die wêreld op te steek. Jy weet daai kinderlike opgewonde oomblik in die klas war jy met jou hand in die lug smeek, “Vra my, erken my, ek is slim, ek is oulik want ek ken die antwoord of ek het ‘n opinie.”

Kyk gou hier, voor ek verder relaas.

 

Die algemene opinie is dus dat ons vriend hutsmerk  begin het by die Romeine as ‘n mate en gewigte oftewel pondteken, toe vervorm wetenskaplike en mediese geskribbel dit , en toe kom telefoon-en rekenaartegnologie en toe Twitter. Pffft. Nee man, die oermense het dit reeds gebruik om moontlik iets sinvol aan te dui. Miskien beteken # ‘ek was voor jou hier!’

Om Shrek se analogie te gebruik oor ondiere (ogres) wat soos uie is, hulle het lae. Woorde en simbole is ook soos uie. Lae en lae betekenis. Ek dink so by myself, die oeroue  hutsmerk op die klip by Blombosgrot is miskien in die mens se oer-genitika gebêre, en het oor die tye heen in ons onthou teruggekom omdat ons sin moet maak van ons immer veranderende wêreld. Inderdaad, dan is daar niks nuut onder die son nie!

Liewe leser, dit bring my by ‘n gedagte dat argeologie, geologie en al die -gies in die moderne wêreld, ‘n soeke na die oorsprong van die mens, ‘n behoefte is om te behoort. Om ‘n geslagregister daar te stel wat sê ons is familie, ons hoort iewers.

God het vir ons reeds geslagregisters se belang in die Bybel verduidelik. Ek negeer nie slim mense se werk nie. Onthou asseblief my ou verduidelikinkie aan die begin van hierdie ompadstorie. Hierdie is maar my dink.

Kom ons begin by die begin. Adam en Eva word na God se beeld geskape. Hulle foeter die paradyslike bestaan wat beplan is op. Want hulle is nie God nie, hulle is net na Sy beeld geskape. Vrye wil is die doring in die vlees. Adam en Eva, bannelinge moet nou wroeg en sweet om te bestaan. In pyn, soos sy gewaarsku is, baar Eva twee seuns. Kain en Abel. Nou ou Kain, ag, ja. Hy sal in ewigheid bekend staan as die eerste moordenaar, sy broer die eerste martelaar en eerste mens wat by God in die hemel is.

Kain vat sy paai en waai en gaan maak sy make, met ‘n klomp omgee en bemoeienis van God. Na hy weg is, word Set gebore.

Gaan lees in Genesis 4 en 5 die twee broers se storie. Kain het genade van God ontvang, hy kon wegtrek en ‘n lewe gaan maak. Ek slaan my hande saam. Want wat uit Kain met genade en al spruit is baie talentvolle mense – mense wat stede gebou het, veeboere, koper en ystersmede, kunstenaars. Maar ook geweldadige mense, wraaksugtige mense. Lameg se woorde laat ys my hart omklem: “Ada en Silla, luister baie mooi en spits julle ore: ek, Lameg, ek duld niks van niemand nie. Ek sal ’n man doodmaak wat my wil wond en ’n seun wat my wil beseer. 24Kain is sewe keer gewreek, maar ek, Lameg, sal 77 keer gewreek word.”  Nêrens lees jy van ‘n verhouding met God nie. Vergete is God se genade en beskerming aan Kain. Belang in mag en besittings en rykdom. Selfsug. Ekkigheid. Laat dit jou nie aan ons moderne wêreld dink nie?

Dan lees mens die stamboom van Set: “Gen4:25 Adam en Eva het weer ’n kind gehad en hulle het hom Set genoem. Eva het gesê: “Die Here het my ’n ander kind gegee in die plek van Abel wat deur sy broer Kain vermoor is.” 26Set het ook ’n seun gehad en hom Enos genoem. In die tyd van Enos het die mense die Here begin aanbid.

Gen 5

Die name van die mense wat voor die groot watervloed geleef het

1Hier is ’n lys van Adam se afstammelinge: Toe God die mense gemaak het, het Hy hulle op so ’n manier gemaak dat hulle na Hom gelyk het. 2Hy het hulle as ’n man en ’n vrou gemaak, hulle geseën en hulle “mens” genoem die dag toe Hy hulle gemaak het.

3Toe Adam 130 jaar oud was, het hy pa geword van ’n seun wat net soos hy gelyk het. Adam het hom Set genoem. 4Na Set se geboorte het Adam nog 800 jaar geleef en ook nog ander seuns en dogters gehad. 5Adam was dus 930 jaar oud toe hy dood is.

6Toe Set 105 was, is sy seun Enos gebore. 7Set het na Enos se geboorte nog 807 jaar geleef en ook nog ander seuns en dogters gehad. 8Set was dus 912 jaar oud toe hy dood is.

9Toe Enos 90 was, is sy seun Kenan gebore. 10Enos het na Kenan se geboorte nog 815 jaar geleef en ook nog ander seuns en dogters gehad. 11Enos was dus 905 jaar oud toe hy dood is.

12Toe Kenan 70 was, is sy seun Mahalalel gebore. 13Kenan het na Mahalalel se geboorte nog 840 jaar geleef en ook nog ander seuns en dogters gehad. 14Kenan was dus 910 jaar oud toe hy gesterf het.

15Toe Mahalalel 65 was, is sy seun Jered gebore. 16Mahalalel het na Jered se geboorte nog 830 jaar geleef en ook nog ander seuns en dogters gehad. 17Mahalalel was dus 895 jaar oud toe hy dood is.

18Toe Jered 162 was, is sy seun Henog gebore. 19Jered het na Henog se geboorte nog 800 jaar geleef en ook nog ander seuns en dogters gehad. 20Jered was dus 962 jaar toe hy oorlede is.

21Toe Henog 65 was, is sy seun Metusalag gebore. 22Henog het sy hele lewe lank baie naby aan God geleef. Na die geboorte van Metusalag het hy nog 300 jaar geleef en ook nog ander seuns en dogters gehad. 23Henog se ouderdom was dus 365 jaar. 24Henog het baie naby aan God geleef, so naby dat hy op ’n dag net nie meer daar was nie. Hy was weg, want God het hom kom haal.

25Toe Metusalag 187 was, is sy seun Lameg gebore. 26Metusalag het na die geboorte van Lameg nog 782 jaar geleef en ook nog ander seuns en dogters gehad. 27Metusalag was dus 969 jaar toe hy gesterf het.

28Toe Lameg 182 was, is sy seun gebore. 29Hy het die seun Noag genoem en gesê: “Hy gaan ons nog moed inpraat as ons sukkel en moeg gewerk is. Hy gaan ons nog troos as ons so swaarkry op die aarde wat die Here vervloek het.”

30Lameg het na die geboorte van Noag nog 595 jaar geleef en ook nog ander seuns en dogters gehad. 31Lameg was dus 777 jaar oud toe hy dood is. 32Noag was 500 jaar oud toe sy seuns, Sem, Gam en Jafet, gebore is.”

Mense wat lank geleef het, en nes Kain se mense gewerk en oorleef het. Maar met die verskil: hulle het God aanbid. Hulle was mense na God se hart.  Hulle geboorte en sterfdatums is in God se Woord aangeteken.

Dit is die oermense wat ek in my stamboom wil hê.  Feilbare mense wat geweet het God is daar, alomteenwoordig en aanbiddenswaardig.

Wat is jou #?

Ek kies #GodSeKind 

—————————————————————————————————————————-

Verdere luister en leesgoed:

https://maroelamedia.co.za/nuus/sa-nuus/oudste-tekening-ooit-in-sa-gevind/

http://www.duluthnewstribune.com/news/science-and-nature/4498490-archaeologists-just-found-oldest-drawing-its-70000-y

Blitsverkoper:Die Barge @ Die Dam

hartiesWhoop, maar was die Harties kuier nou lekker. Daai barge kan darem vir jou stories vertel. Lekker, man, lekker. Gelukkig het Una vir Bertrus mooi opgelei. Dis ‘n grappie, ek het vertroulik verneem dat hy baie lief is vir mense en vir kuier – ons Towerinne is sommer dadelik eiemense gemaak. Die twee Harties gansies weet hoe om swane en eende ewe welkom te laat voel.

Daar is reeds baie gekommentaar oor die barge en Tiramisu en wyn en lilo’s en nie-so privaat ablusies.

Die besoek aan die Kosmos boekwinkel was vir my ‘n belewenis. Kyk net die mooi trappe. Dankie Una! Met ‘n boek kan jy mos vir my in ‘n wip vang. Die Kindle is juis altyd in my handsak, volgelaai, om te kan lees net wanneer ek kan.

By die Kosmosboekwinkel loop ek toe mos ‘n storie raak oor ouer vroue – verhoudings, loopbane en elkeen met hulle eie storie, diep weggebere. “The Resaurant@The Mill” deur Linn B. Halton, het ek vir ‘n appel en ei gekoop en ek gaan dit my toerleestof maak. Ek sal mal word van “the wheels of the bus go round and round” – sien julle nou hoekom ek agter wil sit – niemand sal kan sien ek lees nie!

In elk geval, toe ek die boek se opsomming klaar lees het, sien ek so voor my geestesoog die 14 Towerinne en hulle storie(s). Ek gaan ‘n boek skrywe. Dit gaan ‘n epiese blitsverkoper wees. Deon Meyer kan gaan slaap. Dit gaan van papier op die silwerdoek  beland – so soomloos soos Tom Cruise met Cold Mountain gemaak het! Daai besoek aan die stel van Pretville het natuurlik ook te make met my silwerdoekvisioene.

…………………………………………………………….

My storie se naam gaan wees “Die Barge@Die Dam” wat aan Bali en Ballie behoort. Hulle nooi 13 vroue wat saam met Bali op ‘n landwye tog deur Suid-Afrika beplan, om hulle reis by die dam af te skop. Die vroue is van oral in die land.

Een karakter is ‘n statige vrou wat sommer uit die bloute in ‘n sensuele danseres kan ontpop – veral as spierpaleise in die omtrek is. Meestal is sy nogal wetsgehoorsaam en kan haar springmieliebesige bantingkundige vriendin goed in toom hou. Hulle het die vreeslikste rusies in die kombuis en dit laat weer hulle welberese vriendin sommer na wyn in haar trommeltjie gryp.

Twee nuwelinge in die groep, Bondels en Nootjie, skrik so, hulle vergryp hulle aan die bantingkundige se poeding, onbewus dat dit ‘n oordosis Frangelico bevat nie. Hulle drink ook te veel van die Nieu-Seelandse energiedrankie wat komplimenter rondstaan. Die gevolge sal nie beskryf word nie.

Die ander stil, statige en diepdenkende vrou met haar silwer bob kan die gebras nie vat nie, en klim op ‘n lilo agter aan die vlot vasgemaak. Dit het tot gevolg dat die wille wragtigs van die groep onder leiding van voorswemmer Hes, die vlot onder haar uit probeer spring. Die oud-onderwyseres en kaggelsmous hits die jongeres aan om die lilo om te stamp.

Die klomp kom nie agter dat hulle watervresige wespiemaat alles op kamera vaslê nie…en kort kort met haar selfoon besig is nie. Niemand besef sy is eintlik Hia de Sint, die beroemde ondersoekende joernalis. Oorkant teen die damoewer flits die son teen kameralense – die paparazzi is ook aan die kiek – Baron Room aka AJ en Paraguay Informant aka DC.

Die watersports kom tot ‘n einde toe die son sy tone in die dam druk. Die vroue strek salig uit oor die lekker sagte Bali kussings en ‘n relatiewe stilte daal toe.  Dit is egter van korte duur.

Die kreweltjie in die groep bely so ewe uit die bloute dat sy toe al die tyd die grootste gros van die Toweropstal diamante gevat het toe die Tiramisu ontplof het. Sy was onder die tafel aan die slaap, en die goed het letterlik in haar kloue beland.

Die Borg se vreugde ken geen perke toe die ou goggatjie ‘n sak vol blink klippers op die tafel uitkeer. Alles is nie net meer om den brode nie! Die toer en toekoms is vir almal verseker!

Die twee motorfietsentoesiaste in die groep wil met mag en mening vir die Ballie oortuig om hulle wal toe te neem sodat hulle hul motorfietse kan wheely van pure blydskap – want nou kan almal se gastehuis drome ook bewaarheid word.

Niemand behalwe die paparazzi en die wespie sien die paddamanne met gewere wat oor die vlot se kant klim nie…en die dinges breek los.

……………………………………

Dink julle nie dis ‘n bakgat storie nie?

Ek kan nie wag om die verhaal behoorlik uit te skryf nie. Gaan sommer op pad na Bondels op die plaas begin werk.

O, en ek wil vertel van ‘n klankie op die bus – niks met die privaatjie te make nie…sal môre vertel.

Una – jy het gesorg dat ek uit my lui vir skryf-bui kom! Lekker.

Om jou blogpos by te voeg of om die ander bloggers te lees, kliek op die volgende: http://www.inlinkz.com/new/view.php?id=797928

 

 

 

 

 

‘n Lenteaand in Afrika

Fokuspunt op ons stoeptafel. Met en sonder flits. Vreugde as verlede jaar se Amarillis bol nog wil blom. Dis lekker vredig op die Watervalplaas se stoep. Die brakke is dansky Bab se insette gesomer skeer. Koda- koos is geflous in badtyd in. Die tuin is waternat en Rots braai.

Varktjops, vetgatjies en Caprese slaai op die spyskaart. (Vetgatjies is hoenderbors gevul met Feta en in ‘n spekkombersie toegedraai. Ons Vleislapa Marshallstraat se Marius wat immer kreatief met kos omgaan en vir lekker en nuut sorg.)

En dan. Die Springbokke, die Springbokke. Wat ‘n sege. Epies. Tweehonderd ses en twintig tackles en twee wenpunte later. Lekker, lekker tonekrul troef. #Bokke. Siestog All Black land is in rou gedompel.

Ag, dis lekker op die stoep. ‘n Lenteaand in Afrika.

Tuindag

Ek is al maande met die varkgriep en nagevolge sommer blegh. Die afgelope twee weke aan bed en huis gekluister. Sedert gister voel ek soos myself, uiteraard moes ek buitentoe. Nodig die grond onder my voete en die son op my kroontjie. Ek loof en sing. Kyk hoe vrolik is ons nuwe seisoen van groei. Eenkant toe skete, eenkant toe!

Goudgeel

Mooie eenvoud

Lente lekkerruik lekkerte

Kyk hoe Van Gogh die irisse

Fotodief, Oscar, my blommebrak

Oranjemooi

Koda-Koos steel die kollig

Malse Malva

Wens ek kan in woorde vertel hoe lekker ruik die ster jasmyn

Die mooiste mooi in die agtermiddagson

Mooi, mooi 28

I just adore this artist, praising from her heart to paper and enriching our lives. How awesome are her own words about this painting.

Tharrie Zietsman 2011:”This was done for a Women’s Conference at our church – I was on the stage painting during the event. Title “Allow…but God”. Afterwards I spoke about the releasing of perfume from crushed flowers, our lifes, and then the healing from Jesus that was crushed on the cross for us. The painting is a invitation to bring your crushed life so that God can realese His perfume of love & the Holy Spirit in our lives. Based on Song of Solomon 2:10-15.”

https://praisecreatures.blogspot.com/p/about.html

Wie is jou Agitofel? Of is jy hy?

Toe ek die eerste keer vir Agitofel in die Bybel raaklees, het ek heel uit my sondige mens oogpunt die ou nogal jammer gekry. Mens se medelye met die man droog egter gou op.

Aanvanklik het ek  my probeer indink hoe ek as ouer en grootouer sou reageer as aan my geliefde kleinkind gedoen word wat Dawid se wellus na Basteba veroorsaak het.

Sien, Agitofel was ‘n wyse, gerespekteerde raadgewer van koning Dawid. Batseba, was Agitofel se kleinkind, dogter van sy seun Eliam. Sy was met Uria, ‘n topsoldaat in Dawid se leër getroud. Dawid, oorweldig deur die skoonheid en ekkigheid, sorg dat Uria op die slagveld omkom. Batseba die buit. Dit kom teen ‘n helse prys.

Dawid en Batseba se eerste kind sterf voor hy genaam kon word. Natan berispe vir Dawid en in geen onduidelike taal beduie hy vir Dawid waar die wortels begrawe is.

Dawid, en ek is oortuig Batseba ook, gaan verootmoedig hulle voor God en bely hulle sondes. Hulle keuse verseker nie ‘n vrypas na ‘n lekker lewe nie, maar Dawid is geboek as ‘n man na God se hart. As gevolg van keuses het Dawid se koningskap nie deur rustige waters gegaan nie. Sy een kind het teen hom opgestaan, sy ander kind kry bo hom die voorreg die tempel van die Here bou.

Salomo word uit die huwelik gebore, en die tweede oorlewende kind wat volg word na die wyse man en vriend Natan vernoem. As jy lees hoe Batseba pleit by Dawid om Salomo sy opvolger te maak, Salomo se vertelling van die wyse woorde van ‘n ma aan haar seun aan die einde van Spreuke lees, kan jy aflei dat Batseba ‘n wyse, gerespekteerde en geliefde vrou en ma was. (2 Sam11 en12 en 1 Konings 1 en 2),

Het jy geweet behalwe dat Salomo die voorsaat van Jesus se aardse pa, Josef, was, Nathan die geslagsregister na Maria, one Jesus se aardse ma, lei?

Maar wag, dis nie waarmee ons besig is nie. Terug by Agitofel.

Nou die twee kinders se oupagroot Agitofel, ruk vir hom op oor die Dawid en Batseba ding en heel onwys gaan kies hy kant teen sy bloed en steun sy agterkleinkinders se halfbroer, Absalom, toe hy Dawid probeer onttroon. Wat ‘n menslike intrige. Agitofel se bitterheid oorskadu sy godgegewe talente en wysheid, en hy gee vir Absalom die vreeslikste, geweldadigste plan om oorwinning te verseker. Gaan lees self.

God het egter ander planne en die bittere wraak word gefnuik. Absalom verstrik in boomtakke en Agitofel vlug huistoe en hang homself. (Het jy geweet daar is sewe selfmoorde in die Bybel aangeteken: Abimeleg, Simson, Saul en sy wapendraer, Agitofel, Judas en Simri. Dis anderdag se gesels werd.)

Uit bitterheid verlaat Agitofel vir Dawid en steun Absalom se opstand teen Dawid. Hier raak dit interessant. ‘n Mens wil so maklik wraak sweer, bitter wees oor wat die lewe uitdeel. Soos Agitofel. Maar hoe skop jy nou ‘n lawaai op en skreeu ten hemele en luister nie na wat God vereis nie?

Dis hier waar my aanvanklike jammerte vir Agitofel verdamp het. Daar staan tog duidelik geskrywe die wraak kom God toe.

Dis ook hier waar ‘n vreeslike besef my omslaan.

Wie is jou Agitofel? Wie is daar wat as gevolg van jou verkeerde optrede, besluit, jou sonde so bitter soos Agitofel voel, en miskien ook sy rug op God se leiding, onderskeiding en liefde keer?

Wie se Agitofel is jy? Wie het bitterheid, wrokkigheid en wegsteekgoed wat net jy en God van weet, in jou siel se agterkamer laat kom woon?

Ons het nodig om ons Agitofel(s) te gaan sien en te sê askies. Om eerder saam voor God ons fout, seer, woede, teleurstelling uit te stoei, te bely en neer te lê. Nie wrokkig en bitter te bly nie. Dit is geen maklike taak nie. Maar vra vir Jesus, goed met ewigheidswaarde kom met ‘n pynlike prys. Goddank vir Sy liefdebloedoffer en God se onbegryplike vergewende hart.

Agitofel se verhaal moet ter harte geneem word. Daar is geen twyfel dat Dawid vreeslik gesondig het, en dat sy besluite vir ander laat struikel het. Sy besluite het gewis chaos en seer in sy gesin en vriendekring veroorsaak. Dis die les.

Ek lees iewers raak daar is nog ‘n les by Dawid te leer. Dit is dat jy jouself sal moet afvra wie deur die gevolge van jou afvallige optrede geraak gaan word. Dit alleen behoort ons van besluit te laat verander en laat spaander na God se voete.

En nog is het einde van lesse niet. Ons bestaan op aarde word gekenmerk deur seerkry, val, wegkruip, genesing, opstaan, groei, in dan ook in geen voorspelbare volgorde nie. Die oorlewingstrategie is om elke stukkie van jou lewe by God neer te lê. Om te bely, te vergewe, te loof, te smeek en te groei. Om nie goed terug te gryp of soos Agitofel aan jou binnekant vas te laat groei en te troetel en tot jou eie vernietiging te lei nie.

Dis waar dat seer, op die vlak wat Agitofel dit beleef het, erg is. Asemsnakkend erg. Dis egter ook skokkend waar dat onverwerkte seer soos ‘n kanker jou siel vol bitterheid en wrok kan giet, en tot erger seerkry en verwonding kan lei.

Agitofel se koestermonster het hom van wysheid en oordeelkunde gestroop, het hom van God die gewer van sy talente laat wegdraai. Sy behoefte aan weerwraak was so erg, dat toe sy planne klaaglik misluk, hy sy eie lewe neeem. Sjoe.

Hier kom die groot opdrag. Wat het Jesus verlate, verguis in Sy grootste lyding aan die kruis gedoen? “Vader vergeeef hulle, hulle weet nie wat hulle doen nie,” het Hy met sy amper laaste asem gebid.

Hy het almal vergewe wat Hom verlaat, ontken en teleurgestel het. Elkeen van ons. Sy vergifnis strek tot in ewigheid. Sy Gees woon in ons, om ons te help om nie Agitofel se keuses te maak nie.

Hoor as God sê wraak kom ons nie toe nie, dis God s’n, alleen. Wys bitterheid ala Agitofel die deur en gaan praat met jou Agitofel.
Deut. 32:35Ek sal wraak neem. Dié wat dit verdien, sal Ek terugbetaal.

Rom. 12:19 “Laat staan al julle wraakplanne, my liewe broers en susters. Dit pas glad nie by gelowiges nie. Los sulke dinge vir God. Daar staan immers in die Bybel: “‘Ek alleen het die reg om te straf; Ek sal wraak neem,’” sê die Here.

Lees ook Hebreërs 10:30-31

Ek sit hier en dink, is dit deels te wyte aan die les uit sy oupagroot Agitofel se wegstap van wysheid wat Salomo so wys laat kies het ten gunste van onderskeidingsvermoë en met soveel meer deur God se blyhart beloon is?

Lees hier oor Agitofel:

1Kronieke 27: 33, 34

2 Samuel 12:11

2Samuel 16:21-23

2Samuel 17:1-2

Psalm 55: 12-14

 

 

Emmerskoplys nuus

Van kleintyd het my ouers my en Swartjie  bederf met comics – Dennis the Menace, Casper, Huey, Archie, Sylvester en Tweety, en ook Classics – so het ek van Shakespear en ander klassieke werke geleer. (Ek wil nog daaroor skrywe, nie nou nie)

Op hoërskool was dit tweede natuur om na die ingevoerde tydskrif rak in die skryfbehoeftewinkel op Barberton te loop en te blaai. Metterwyl is comics verruil vir tienertydkskrifte: Jackie, Poswop, Pink en Fabulous. Nuwes is by die toonbank vir my gebêre.

Ag jinne, eers was dit Donny Osmond. Toe David Cassidy – plakboeke vol het ek gemaak van die gevreetjie. David Essex, die Bay City Rollers en Slade met hulle platformskoene, pullovertjies, uitklokbroeke en lang hare. My pa het dikwels die koors wou kry en geterg, maar nooit my tienergedrag bespot of kleineer nie. My laat begaan. Ag ek het lirieke van liedjies wat ons hier in Suid-Afrika gehoor het nie, geken en ook al die sterre se stories geweet.

Toe kom Marc Bolan, David Bowie, Queen en Roxy Music. My tienerhart. Bryan Ferry is my hartklop van toe af. Ek weet, hy het ‘n ou oliekuifie en muisgevreetjie, maar o, daai stem en lyf en hande wat so een met die musiek word. Ek treiter Rots gereeld as hy te veel pruim oor sy Dubbel-D gunsteling, Sarah Theron, dat ek hom sal inruil vir Bryan Ferry!

Ek word oujaarsdag 2018, 60. Verlede week kom Rots so ewe en vra of ek weet wie kom na Suid-Afrika vroeg in Februarie 2019. Hoe sal ek nou weet, die Pous? Prins Harry en Meghan? “Nee, raai nog. Jou hart gaan dit nie hou nie,” hou hy aan terg.

Wel, ek gil soos ‘n tiener toe ek uitvind dis Bryan Ferry – my crush sedert 1972 toe ek hom ‘Virginia Plain’ saam met Roxy Music op LM Radio hoor sing het. Daai stem, daai saxofoon. Ek terg Rots en sê ek wil net die konsert bywoon – dis al present wat ek vir my mylpaalverjaardag wil hê.

Vanoggend vroeg is Rots op die tablet en raai, op 16 Februarie 2019 het ek en hy date night. In Menlyn. Ons sit DV in blok A, voor die verhoog as Bryan Ferry kom konsert hou. ‘n hele 90 minute, en ek sal die wit van sy oë kan sien. En nee, moenie kommer nie, ek sal nie my buustelyfie of Bridget Jones op die verhoog gooi nie, ek gaan wel vir hom waai en ‘n soentjie blaas.

Dis lekker om na iets uit te sien! Dit maak op vir al die verjaaardae sonder makietie, met kersfeeskoek en halfmaswense wat tot middernag uitgestel word om sommer gelukkige Nuwejaar ook te hoor!

My groot persent kaartjies is reeds uitgedruk en saam met oornag in die grênd hotel reeds betaal in ‘n koevert in die kluis.

Wie se oud word is nie lekker nie. En ja, dis goed om geduldig te wag, wense word oor tyd waar.   My emmerskoplysie groei mooi. Die ander goed op die lys – dis nie vir die grootklok nie….hierdie wat volg is met regmerkies op die lys.

Besit sonder die bank  se inset ‘n Karoohuisie

Besoek Ulurhu, raak aan daai stuk oerklip

Ontmoet Imran Khan – toe hy nog krieket gespeel het

Bryan Ferry in konsert -hy kan nog, kyk: