Koffie moer verloor nie sy boontjie nie. As jy die HOC Home Blend sak oopsny en in die glashouer uitgiet, sal ‘n paar van die miniskule bliksempies alger oral heen bokspring, soos mexikaanse springbone. Veral as dit bejaarde onvas onvas oggendhande en onbebrilde oë is wat die oorgooi werk doen in die oggendskermerte.
Hulle sal oral uitspat en ‘n moeilike CSI toneel los om op te ruim. Lank na opruim, so teen oormore, sal jy nog ‘n korrel agter die suikerpot kry.
Ergste van die swetterjoel koffiemoer is dat met die met die plonser na benede se tog, ‘n klomp so wrintie verby die siffie sal krioel om te kom koffiemoer in daai laaste behaaglike slukkie koffie.
En dan. Nes Custer wat vir oulaas standpunt inneem sal hulle wrintiewaar in die lopende kraanwater wat wag om hulle in hulle moer, drein af te stuur, eers verspot soos ‘n kwetterjoel rooibek kweleas, laf in moer murmerasie formasie die wasbak om riel en te ramba en vasklou.
So een keer per jaar kom kwetterjoel swerms rooibek kweleas in die veld naby die plaashuis. Jy hoor hulle tweedle-toodle-tweedle – klink soos “kom ons eet alles op” met vlerkgeruis as begeleiding. Grassade het min skuiling teen die aanslag. Daar word oral in Afrika swerms van derduisende gesien en hulle word ook die geveerde springkane genoem.
Sleg vir oeste. Ook sleg vir die geelwewers en vinke wat binne die ringmuur van die tuin by my kamervensters in die witstinkhout nesmaak. Swaaiend leef hulle in hulle omheinde eksklusiewe woonbuurt, met volop water en smorens sesuur, al die voëltjiekos wat hulle hartjies begeer. Knus en onbewus van die wrede wêreld daar buite.
Nou in saad tyd, net so 500m van hulle swiesj-en swoesj die derduisende rooibek kweleas. ‘Kom ons eet alles op’ dreunsing die massa. ‘n Verkenner het die bakkies met voëltjiekos binne die ringmuur gesien. Binne minute hoor jy net ‘n geruis en kwettery, dan is die kos op, die skade is gedoen en hulle kwetterjoel verder na sadiger weivelde. Die vinke en wewers stomstil na die aanslag.
Wat interessant is van ‘n rooibek kwelea, en alle voëls wat so in massa formasie vlieg, is dat ‘n enkele voëletjie net fokus op die sewe ander naaste aan hom om dan hulle perfek te mimiek wat afstand, vliegspoed en rigting betref. Dit is hoe jy in ‘n massa optree en oorleef. Wanner hulle rus, pak hulle tot 500 in een kubieke meter saam!
Ek wonder toe, is dit wat met die swetterjoel ingebusdes by ‘n EFF protes in Brackenfell en Senekal gebeur? Jy hou net die outjies om jou dop, en hulle diegene om hulle, en gou is dit ‘n rooipet swerm wat soos een golf dreunsing en voerentoe beweeg. Skade aanrig en uitmekaar spat. Sulke kwetterjoele.
Hoe het ek nou by die EFF beland?
Ek was met koffiemoer besig.
Soos met baie dinge, word ek ‘n les met my moerige murmerasie geleer en ek lag vrolik terwyl ek net daar besef dat ‘n koffieboon gepluk, gerooster, gemaal word om seker te maak dat smulpape en koffiesnobs die volle geskenk van geur en smaak daar uit kan put.
Ek bid so lag, lag: As U my dan kom haal, laat ek asseblief moerig uitspattig bly, deur die gepluk en gerooster en gemaal van die lewe. Behoed my dat ek nie die massa volg nie. Tot die laaste oomblik wanneer ek na U Lig terugkeer.
———–
NS. As jy meer wil weet oor rooibek kweleas, gaan lees by onse blogvriend: https://dewetswild.com/tag/red-billed-quelea/
Ek weet hy sal dit waardeer. Dankie dat ek ‘n foto kon leen.
Ek het laasjaar die kwêlas in aksie gesien by my. Maar dit was gelukkig nie in iemand se oesland in nie, net die onversorgde omgeploegde land wat toe orals net opskiet grasse en bos gegroei het. Ek het hulle eers gewaar toe ek soek waar daai swoesj vandaan kom. Ek het my verstom oor hoe die swerm deur die loop van paarvdae gegroei het en juis ook hoe hulle so in formasie saam kon vlieg sonder om in mekaar in vas te vlieg. Jy hey nou die antwoord kom gee. Dankie. Jy my liewe maat sal nooit n bondel, massa mens wees nie. Daarvoor is jy te uniek en spesiminjaal…🥰
LikeLiked by 1 person
Koffie moerig besig. Hehe.😘
LikeLike
Ek sien uit na die dag wat ek kom aansit vir daai moerige koffie en beskuit
LikeLiked by 1 person
Wena, jy weet dan☕☕🎉
LikeLike
Beslis 😘
LikeLike
In el;ke skepsel koffiebone is daar altyd ‘n paar wat nie wil konformeer nie, maak nie saak hoe hulle gerooster en gemaal word nie. Dis hulle wat die lewe in sy andersheid geniet 😘
LikeLiked by 1 person
Ammen liewe Hester, amen
LikeLiked by 1 person
Synde ek nie n groot koffie aficionado is nie, kan ek nie identifiseer met die koerige moer wat nie wil saamwerk nie, maar ek kan my geheel-en-al indink dat n graanboer, of vinkie-voerder, nie so ingenome sal wees met n duisend-sterk swerm kweleatjies nie!
Baie dankie vir die “link” na ons blog, jy is reg dat ek dit baie waardeer!
LikeLiked by 1 person
Dankie dat jy goeie mense is en vir die inloer.👋
LikeLiked by 1 person
Kweliavlugte is iets ongeloofliks om te aanskou. Dis ‘n oulike vergelyking wat jy tref van hoe om in ‘n massa te oorleef.
Jy speel so lekker met woorde, dis hoekom dit so lekker is om hier by jou te lees.
LikeLiked by 1 person
Dis mesmeraaising die massa vlug en tol. Dankie mater.
LikeLiked by 1 person
Soos altyd so mooi geskryf…. en dan leer jy my nog iets van die natuur ook. Dink ook nie jy gaan jouself laat vaskeer saam met die massas nie…. sal jou agter die suikerpot loop soek.
LikeLiked by 1 person
Dankie liewe Kameel.💝☕
LikeLike
Ja-nee jy het die vermoë om ‘n mens se aandag vas tevang van begin tot einde. So bly jou muse is terug. Laat daardie woorde uit swoesj en swaai, jy mag maar. Daardie swerms is beslis iets om dop te hou. Vlieg nou nog soontoe en woesj draai hul in hul spore om en kies n ander koers. Die vergelyking van voëls en die rooi gewaad van massas is ook beslis heel goed beskryf.
LikeLiked by 1 person
Scrapy baie dankie vir die mooi aanmoediging. 🥰💐
LikeLike
Jy is baie talentvol en spesiaal vir my ook.
LikeLiked by 1 person
So mooi en lekker geskryf! En waar, en interessant. Terloops … moenie koffiemoer onderskat nie – ons gooi dit in die tuin, dit verjaag slakke. Dus, selfs post mortem werk dit nog!😉
LikeLiked by 1 person
Hallo Christa, so lekker om jou hier te kry. Het onlangs ‘n luefkind van jou Thailand avontuur vertel, sy het pas gehoor sy mag gaan juffrou daar. Groetnis. NS. Ek gaan daai moer dadelik tuin toe vat, dankie.😄😘
LikeLike
Ek het verlang na jou unieke skryfstyl, lekker om weer ‘n slag by jou te lees
LikeLiked by 1 person
Net so lekker om jou hier te vind, so oor die skeidings heen.🙃
LikeLiked by 1 person