Erna Maré – Blou Karoo spieël

Gedurende hierdie 40 dae (Lent) besluit ek om Jesus se 40 woestyndae te betree saam met NG Graaff-Reinet en * Mosaiek Lent 2019. So eenkant ver, alleen op die plaas buite Polokwane, maar ook daar in my geliefde sielsplek.

Soveel gewaarwording en seëninge net die afgelope paar dae op die reis.

Ek leer dusver

…in hierdie herfstyd, waar bome hulle blare afskud, om die winter se rus af te lê, oppad na die lentebloeityd, moet ons ook so voorberei. Dinge aflê, laat los en laat gaan. Nuwe groei en genade lê voor.

…stilword is wanneer ons beter leer luister, sien en hoor.

…om in die woestyn in te gaan met God se Woord , leer ek saam met Malcolm Guite ” the Book you open, always opens you!”

…dra nooit die woestyn binne jou nie. Woestyne van binne groei tot alles koud en dood is.

…om vol te wees aan goeters, soveel soos die sandkorrels van die woestyn, maak jou leeg aan God en Sy Liefde. In die woestyn maak ek leeg aan goeters, en word vol van wat God wil hê – liefde, geloof en hoop.

…in stilte en kyk en luister, leer ek ons alledaagse lewe is God se megafoon. In elke dag se liefhê, vreugde, seer, lyding, stress, kommer, selfs in die seepbelle van die skottelgoed- en waswater se reënboë, praat God in alledaagse taal met ons.

…stilte is ‘n oase. ‘n Poel water waar, as jy lankgenoeg vertoef – sien jy die bodem, en as jy mooi kyk sien jy die hemel ook terugspieël soos my foto hierbo!

…ons moet in ons reis deur die woestyn, nie soos ‘n steeks perd net staatmaak op die oogklappe wat ons daagliks aansit en ons kyk belemmer en keer dat ons groot prentjies sien nie. Ons oogklappe moet af, dat ons ver en wyd kan kyk en verstaan en beter begrip en genade kan ontvang.

…dis beter om treetjie vir treetjie in beskerming te loop soos die skilpad. In stilte en stadig kom wysheid en deurleefde ervaring.

…ons moet ons reis op die lang manier aanpak, nie soos Rooikappie die kortpad vat nie. Die lewe is nie ‘n kortpad nie, die jou eie unieke pad. Loop hom voluit, asem uit, end uit. Die eindbestemming ‘n ewige beloning.

…wees weerloos in jou ervaringe – jou weerloosheid is nie ‘n refleksie op God nie. Weerloos, maar nie breekbaar nie. Om soos ‘n omgekeerde glas op te kyk, oop te wees, om vol van Sy liefde en genade te word.

Waarom deel ek hierdie?

Wel, op persoonlike vlak is die lewe taai – kommer, rande rek, my kind moet opereer word, my man lop krom aan laste, beurtkrag beduiwel daaglikse ekonomiepleeg en ons huishouding, Oom SARS en salarisse kleim elke gerekte rand, ons drome lê in die verskiet, maar nie aan skerwe nie.

Ek kan bitter min aan een van hierdie dinge doen. Ek kan stil wees, sterk wees, op my Pa se skoot klim, maar dis ‘n kortpad vir die tyd. Ek kies om woestyn te gaan loop, soos Jesus. Ons is nou eers halfpad. Kom loop saam, en glo saam op hierdie Lentreis.

Word vervolg

*As jy op die skakel Mosaiek Lent 2019 kliek, kan jy jou eie PDF weergawe aflaai!