Jonawê soos my Elisa sê as goed nie lekker is nie. Jonawê, siestog shame, fok wil ek sê.
Die EFF tweet van Dr Mbuyiseni Quintin Ndlozi waar hy eksklusief vir Siya gelukwens en die res van die groep aansê om hulle gelukwense by die Britse koninklikes te gaan haal, en agbare Steve Hofmeyr wat reken “die Siya inspuiting jou verlam sodat jy nie sal terugbaklei as ons jou grond onder jou gat kom uitgryp omdat jy blank is nie” het ‘n Kwetser (Twitter) oorlog ontketen.
Die outjies is adamant om divisie en onmin en verdagmakery voorop te stel. So gaan julle nie vir enige mens in Suid-Afrika ‘n beter toekoms beding nie. Net bedinges. Ek gaan maar vir julle bid en my skaar by positiewe dinge.
Ek is dankbaar hulle hou hulle daar op die planeet Twitter besig. Hulle besef nie dis ‘n eiland nie, en eilande raak eensame plekke. Net jammer die nuus media reken dis die enigste bron van nuus. Die twee verdien om saam op ‘n eiland te gaan kuier, weerskante van die verbale minderheid.
Rêrig, nat waslappe. Die Nasionale Raad van Provinsies het gister luidkeels die Springbokke se sege toegejuig. Behalwe die ou rooi groep wat hulle taak as politieke opposisie skielik en onvanpas ‘ernstig’ opneem. Hulle het geweier om deel te neem aan die vreugde en hoopvolheid wat tans heers. Hulle het gaan sit, dikbek en lelik soos die einste Ingelse Rose. Hulle wat vir ontwrigting van prosedures berug is. Jonawê. Gesplete tonge.
Bab kom gisteraand by die huis. “Was ek nou spyt vandag,” sê sy terwyl sy ʼn koeldrank ingooi. “Hoe so,” vra ek. Sy vertel dat sy maar so in die euforie en lekkerte van die Springbokke se sege by die pas afgelope Rugby Wêreldbeker toernooi, vir ʼn kennis vra wat hy dink, en hoe hy voel. Sal die ou natwaslap kom met “dis goed en wel, maar die rand is nog swak, die strate is vuil en regering korrup.”
“Ma, ek het my so vererg, maar liewer stil gebly, want sulke mense gaan eknie mee stry nie,” sug my kind.
Ja, my kind, daar is mense wat nie wakker akker wil lewe nie. Dis lekkerder om terug te kyk na tye wat verby is, want dit is verby. Die sleg van verby-tye vervaag. Dis soos met egskeidings en dood, die sleg vervaag en die goeie herinneringe bly. Nostalgie is maar ʼn giftige, dromerige ding en drome is vervlietend.
Ek het juis gister op die radio ʼn groot waarheid gehoor. Iemand beskuldig die huidige regering dat hulle nie damme gebou het nie, en dat die Vaalrivier ʼn gemors is. Ja, die water probleme in ons land is fel. Maar herinner twee inbellers aan twee feite, Suid-Afrika is ʼn droë land, nog altyd. Die damme wat ons het, was om te sorg dat ʼn mindere persentasie van ons land watertoevoer het. Dis hard, maar nie onwaar nie!
Ons denke oor wie almal danksy die demokrasie reg op basiese dienste het moet verander. 57 miljoen mense het daai reg. Nie net ek en jy nie.
Ek dink aan Winston Churchill wat gedurende WOII ʼn klooster op die Engelse platteland besoek het. Vroue en kinders is mos veiligheid ter wille, platteland toe geskuif.
ʼn Muur het gekantel, en die seuns wat daar gehuisves is, het die klippe weer gestapel. Skeef en krom, maar die muur kon weer die skape op kraal hou.
Die kloosterhoof stap saam met die ou bulhond – sigaar in die hoek van sy mond en bekend vir kortaf wees. Die man bied apologie aan vir die skewe muur. Churchill het blykbaar sy sigaar uit sy mond gehaal en vir die man so op en af gekyk. “Any fool can see what is wrong, but can you see what is right,” blaf hy kwaai.
Net so moet ons in die gees van vorentoe loop, samewerking en #ImStaying en #WeAreChampionsAndStrongerTogether voortaan nat waslappe, verlede-was-beter aanhangers, die ons-en-hulles, die negatiewes, agressiewes antwoord. Ook sou ek bylas, as jy soveel verkeerd sien, wat maak jy om dit beter te maak?
Weer kom Elsa Joubert by my op. Sy het wyslik gesê dat ons die klein kampie voor ons met liefde en toewyding moet versorg dan sal goeie dinge volg.
Ons kan nie goed van die verlede wegtoor nie, maar ons kan ons elkeen se kampie bewerk en invloedsfeer so leef dat ons vir die wat saam met ons is se lewens beter maak, mekaar ondersteun en bemoedig om beter te wees.
Flip man, as die mislikepaliteit nie papiere optel nie, kry jou span om die straat skoon te maak. Huur ʼn werklose om te help. Moenie sê dis dit of dat en jy betaal reeds vir dienste nie. Dra by met ʼn oplossing, moenie tot die probleem bydra nie, al weet jy of hoor jy van korrupsie.
Daardie tannie wat oorkant die straat in haar semausu (sypaadjie stalletjie), wat daai lekker magwinya (vetkoekies) verkoop. Hoekom bied jy nie aan om vir haar bêreplek vir haar waentjie wat sy elke dag moet in en uitpak en met moeite moet beveilig of saans saamsleep huistoe, om weer more terug te kom sodat sy kos op die tafel kan sit en vir ʼn gesin kan sorg, net soos ek en jy.
Ons verhouding met ons Regina oorkant die straat is diep en innig. Sy kom smiddae omstreeks 15h00 as haar dag klaar is met haar trollie vol potte en proviand, haar stoele opgestapel. Sy het in die stoor ʼn hoekie net vir haar. Sy het toegang tot toiletfasiliteite, sy voel menswaardig. Ons skenk nie meer vir kerkbasaars of klerebanke nie. Regina kry ons voorheen-beminde klere om eers vir haarself uit te kies en dan te verkoop vir ekstra geld.
Ons lewe is verryk deur haar lieflike glimlag en die blydskap dat kommer oor haar goed oornag verdwyn het. Die spasie wat sy opneem, die water wat sy kom tap, maak ons las nie swaarder nie. Die naglopers kan nou nie meer haar goed gaps terwyl hulle saans in die struktuur kom skuiling soek nie. Vrede in die straat en ‘n nuwe vriendskap met ‘n gesin wat swoeg soos ons om kop bo water te hou. Haar man en kinders deel van ons omte. Die kampie om ons word bewerk. Ek deel nie die storie dat jy moet dink ek is oulik nie, net hoe maklik jy ‘n verskil kan maak.
Ou natwaslap, wat jou werkers nie gun om met die besigheid se voertuig te kom voorraad laai nie. Nee, jy stuur hulle eerder straat af met ʼn trollie om ses keer te moet loop om swaar goedere te kruie. Sies man!
Ou onrusstoker wat mense minag omdat hulle arm is, swart is, annerlik is. Sies man. Die God vir wie jy elke Sondag uit die voorbanke vir ʼn uur dien, Hy het almal gemaak. Niks wat jy of jou soort kan doen kan ons wat nie aan jou standaarde voldoen nie en aan jou oordeel onderwerp word van Sy liefde skei nie. Siestog. Ek kry jou jammer wat so spesiaal is. Ons is lankal nie meer vriende nie, maar ek bid dat skille van julle oë sal val. Dat julle die superioriteit en meerderwaardigheid sal laat gaan. Julle mis uit, julle sit die pot mis.
Hier vertel ek dit nou so dat jy verstaan dat ons gesin se pad al nouer word, hoe meer God se waarheid vir ons word. Ons lag nog baie, drink ons wyn, eet lekker, is gasvry en gulhartig. Maar ons baantjie nie meer vir boeties of boelies nie, ons laat ons nie meesleur aan banaliteit, oppervlakkigheid en agteraf wat dikwels in groot vriendekringe gebeur nie. Jy weet mos, daai bespreking van die ene wat nie vandag in die geselskap is nie, ding. Dis ʼn siekte.
Ons staan nie meer vir sulke dinge nie. Dis waar jarelange ‘vriendskappe’, ek dink eerder dit was ʼn verhouding met egoïste en meerderwaardiges tevrede in hulle gemaksones. Ons het die oppervlakkigheid ontgroei. Daai seisoen is verby.
Ek kry nou net doodsberigte uit die ou kring. Geen ander nuus oor nuwe kleinkinders, vreugdes en sommer net nuus nie. Nee, net die doodsberigte. Wil ek regtig weet? Hulle wat sonder slag of stoot besluit het ons is nie meer vriendskap werd nie. Wat wil hulle van my hê, dink ek terwyl ek maar simpatie betuig en sterkte toewens. Here, dankie dat U genadig met my is en dat ek kan troos al word dit nie vir my gegun nie.
Op Palmsondag vanjaar– die dag wat Jesus op die eseltjie geklim het en die wat kon sien en geglo het, palmtakke voor hom neergegooi het en ‘Hosanna’ geskreeu het, hoor ek op die nuus dat daar wêreldwyd GOT (Game of Thrones) ‘watch parties’ gehou word, want die kultus reeks se eerste episode in die finale seisoen word uitgesaai. Ek het geen idee waaroor die bohaai is nie.
Die kinders vertel dis soos Vikings, maar fantasie oor heerskappy, haat, gierigheid, verraad, seks, mag die hele toetie. Woes en wild en wreed. Dis mos hoe dit oral is. Ek wil nie herinner word nie, die werklikheid is genoeg.
Die Troon waarin ek glo is ewig. Op die Troon sit ons Skepper. Dis nie ʼn speletjie nie. In die Ewige storie word die dood oorwin, ten spyte van menslike gierigheid, wreedheid, selfsug het ons ʼn Oorwinnaar vir ons wat ewig by God sit. Jesus. Hy tree genadiglik vir ons mens foute en seermaak in en ons almal kan erfgename van die koninkryk van God wees.
Dis vir ons almal. Die onse en die hulles, die onrusstokers, die onminsaaiers – jy moet net jou hart oopmaak en leer menswees is ons almal sʼn. Of ek armer, leliker, ryker, slimmer, dommer, vetter, maerder, witter of swarter is.
Richard Rohr se waarheid dat ons nie in beheer is nie, ons almal voor God ewe mense is en dat ons almal gaan sterf behoort mens nugter te maak vir die ondermaanse bestaan. Jou genadig met jouself en ander te maak.
Dê natwaslap, hier is vir jou hoop en genade. Maak oop jou oë en jou hart. Jou siel ter wille. Dis verniet.
O, net voor ek gaan. Hierdie foto is my Suid Afrika. Dankie Rassie en dankie Siya, ek werk graag saam. Inderdaad is ons sterker saam. My streep in die sand is getrek. Dis hoekom #EkBly #ImStaying.
Hierdie is van my #NaNoWriMo2019 skryfsels oor aanhalings en notas in my skryfkamer. Dag 6 en kyk die eerste 10 000 woorde van 50 000 neergepen.
Mooi vliegie, my setimente ook
LikeLike
Dankie Trommeltjies!
LikeLike
Wat sal mens sê, party mense kom nooit by versoening uit nie, so gewoond om negatief te wees dat dit hulle leefstyl word. Shame
LikeLike
Armsalig om nie kopskuiwe te maak en te groei en gedy nie!
LikeLike
Vermaaksterre wat hulle platforms gebruik vir poltiek. Politiek wat meer vermaak as leierskap bied. Dit is hoe jy weet die mense na wie jy geleer is om op te kyk is die pad byster. Wanneer jy boonop jouself vang dat enige goeie nuus met ‘n maar geantwoord word, weet jy dat jy ook in daardie gat getrap het.
My persoonlike wens: Laat die entertainers entertain, laat die mense in politiek doen wat ookal dit is wat hulle voorgee om te doen en laat die res van die mense met rus om te doen wat nodig is om vrede en voorspoed te bring
LikeLike
Ek het aan jou sit en dink toe ek hier geskribbel het. Wys soos altyd. Dankie dat jy nog hier inloer!
LikeLike
Al daai gekwetter is slegs opinies, en ons almal weet opinies en assholes is een en dieselfde. Almal het een. Die één feit is dat ons krygers het daai bleekbene lelik op hulle hel gegee nes ons voorsate van ouds.
HRH: [Loer langs haar neus af soos iemand want stront ruik] “Eddie, take 23 of our best men and go take the Cup of our beloved sir William Web-Ellis from that boer upstarts”
Eddie: “My pleasure ma’am”
80 minute later…
HRH: “Well Eddie, did you bring it?”
Eddie: “Mam, there was a problem…they brought 23 as well”
HRH: [Raak dieselfde pastelgrys as haar frokkie in die gesig] “Oh bother. These colonies are such a headache!”
Eddie: “Your majesty, it gets worse…It wasn’t only those boer upstarts, They brought Zulus, Xhosas, Sothos, a Couloured from the Cape Colony with lightning in his feet, and even a particularly vicious Matabele from Zimbabwe, they call him the beast”
HRH: [Lyk nou selfs meer na iemand wat stront ruik] “Fokken colonies!” [Skop ‘n Corgi in die ribbes]
HRH: “And get me Boris from number 10 on the line. I want him to immediately start exporting every Land Rover, Range Rover, Rover, Jaguar, MG and Bedford on this Island to South Africa. Let them suffer until they drown themselves in that disgusting Brandy they love so much. They will suffer on their highways, They will suffer on their dirt roads. They will forever be on their knees cleaning oil from their driveways and garage floors. We shall prevail!”
LikeLike
Bwahaha, waar storie, jy laat my hardop alleen oppie plaas skater, die honde en die suikerbekkies moerig geskrik!
LikeLike
Daai klein keffertjie wat wat langs jou skene staan en kef “ja, ja, ja” – dis ek. Kragtige skrywe.
LikeLike
Issie, Jy staan sterk soos ‘n Doberman. Jy leer my om my staan te staan. Dankie maat.
LikeLike
Fantastiese skrywe, Vuurvliegie! Wens dit kan op die lamppale en tv uitbasuin word!
LikeLike
🙈Dis maar hoe my 61jarige hart brand vandag.
LikeLike
Daardie hart sit op die regte plek!
LikeLike
🤗💐🇿🇦❤
LikeLike
Hoor hoor!
Toe ek daai skare van my mense sien op die lughawe gister, toe weet ek weer verseker: Hierdie paartjies wat so ver links en so ver regs van die middelveld speel gaan hulleself nog heeltemal uitwerk, want sien dan die miljuisende in die middel wat almal in Suid-Afrikaner smile al praat hulle watter taal ookal raak goed gatvol, skies Vuurvliegie, vir die bliksems wat ons vir mekaar probeer bang hou.
LikeLike
#SaamKampioene #SaamSterker. Ek bring die besems, dan vee ons hulle uit die pad van ons toekoms.🇿🇦🏆
LikeLike
Jou skrywe resoneer met my my psige. Daar is mense wat deesdae die All Blacks ondersteun met teenoorgestelde politieke sentimente. Oorspronklik was dit weens apartheid en daarom wou hulle a.g.v. apartheid nie die Bokke ondersteun ne. Dit is vir my nog effens verstaanbaar (aangesien hule uitgesluit is uit die politieke bestel) maar sedert demokrasie in hierdie ondersteuning onvanpas. Maar dan is daar ook regse blankes wat die All Blacks ondersteun omdat hulle van mening is dat die All Blacks minder swart is. Hierdie groep het nog die behoefte om rugby te geniet maar hulle bevoordeelde ingesteldheid maak dit nie “moontlik” om de Bokke te ondersteun nie. Hulle het dit geniet toe ons verloor het teen die Kiwi’s. En ons oorwinning steek hulle natuurlik dwars in die krop (mmar ek wonder om hulle nie maar heimlik die bokke ondersteun het toe hulle sien ons wen nie.
My dogter het juis met so iemand – ‘n mede- student gepraat vroeer vanjaar – en ‘n gedig geskryf wat wat in ‘n universiteitsbundel opgeneem is. Daar is baie ironie in die gedig want dit is ‘n 100% Afrikaanse gedig met die titel “Keep the bloodline pure”. Jou hierbo sal ook met haar resoneer.
LikeLike
*skrywe hierbo
LikeLike
Abrie, jy noem nou iets wat ek nooit aan gedink het nie want ek kon nie verstaan dat daar stoere afrikaners is wat die All Blacks ondersteun nie, maar die feit dat daar minder swartes in die span is en dit die rede is, was nou vir my ‘n openbaring. Maar nou wonder ek in my gryse domheid…watter kleur is die Maoris dan wat vir hulle speel? Ek ken glad nie die span nie, weet nie eers wie speel nie, maar ek wonder nou net waar trek mens die streep dan tussen wit en swart? Is die Maoris dalk beige? Ek vra maar net…..
LikeLike
My “All Blacks minder swart” is meer ‘n ironiese as ‘n kleur opmerking. Dit gaan eintlik daaroor dat hulle voel dat Blankes nie in beheer van Springbokrugby is nie en dat die wat in beheer is, is nie vir hulle aanvarbaar is nie en daarom stuff SA rugby, hulle ondersteun die All Blacks. Die realiteit is dat rugby is nie en kan nie ‘n “ons” menende wit spel wees nie.
Die realiteit is dat daar wel politieke inmenging is (maar hierdie inmenging is baie minder as die tyd toe anderskleuriges glad nie Springbokke mag gewees het nie). Wat Rassie so meesterlik maak is dat hy al hierdie moes hanteer, politieke druk en om ‘n wenspan te bou en nou is ons nr 1 – toe hy oorgeneem het was ons nr 6. En hy het dit gedoen tot voordeel van ‘n Suid Afrika in geheel.
LikeLike
Sal jy daai gedig vir ons publiseer, met dogterkind se toestemming asseblief.
LikeLike
Sy het reeds toestemming gegee – ek sal so maak
LikeLike
Bravo vir jou mooi skrywe. Bravo vir jou 10 000 + woorde
LikeLike
Ek sê net amen suster! Jy praat my hartstaal……welgedaan!
LikeLike
Dankie Woordnoot.
LikeLike
Sjoe… dis ‘n hele bek vol waarhede!
Nat vatdoeke… hulle bring niks positiefs nie!
Ek het deesdae begin vra van mense wat vir Presedent Trump so aanval, kan voorstel om beter te doen. Ek sien waar jy vandaan kom met al die geskryf!
Dankie, jy het my nou weereens herhinder dat ek daai vraag ook aan myself moet vra? Wat kan ek beter doen, ja… selfs hier van ver af.
NS – Sorrie… ek sukkel dukstukke om Afrikaans te lees… die lisdexia pla swaar, so maak aseblief al die voute reg, dankie!
Nog ‘n naskrif… ek weet nie of jy my “Lessons” op LinkedIn gelees het nie… basies oor al die positiwe lesse wat ek geleer het van daai wenspan… sonder om ras of ego in die prentjie te bring! Soos jy so goed opmerk… die God wat ons aanbid het almal gemaak…
Mooi loop daar onder… stuur groete vir almal wat glimlag!😃👍🏆🏆🏆
LikeLike
Ek geniet jou kom inloer vreeslik. Ek was trots om jou LinkedIn stuk te lees. Knap gedien en raak geskrywe. #ImStaying groete🏅🇿🇦
LikeLike