Oppistoep olimpieks

Ek is met my liefie en beste vriend, my Rots, in ‘n woordgeveg betrokke sedert 2012. Ja, regtig. Reine waarheid. Olimpieks op die stoep. Ons hou boek.

Ons skrabeer dikwels, beste uit drie. Op ons stoep.

Die braaivuur brand hoog. Brand uit soos vanaand. Woorde vleg oor die bord ineen. Ons hoor die iPod se mooie musiek skaars. Die ys smelt dat die wyn waterig raak. Die brakke vry verniet om ons knieë vir aandag. Minute word ure.

Hy skud plegtig my hand wanneer ek hom die loef afsteek. ‘n Sportman by uitstek. Ek maak ook so as ek die onderspit delf. Dit gaan oor die saam speel, nie die wen nie.

So het ons in tye van vreugde en soms groot seer, saam, om die tafel op die stoep, onsself in woorde verloor.

Dis ‘n voorreg om nog saam te kan en wil speel.

Oor en uit. Die tweede rondte gaan begin…

NS.  Ek loop voor. 😉

 

Wonderbaarlik om ‘n rede

Wie is jy? Sit bietjie stil en dink. Jy, jou lewe, jou liggaam, jou hart, siel en gees. Jou plek  hier op aarde. Wie is jy?

Jy is ‘n versameling  van 1000 600-bladsy volumes in God se hande. Dis hoeveel jou genetiese struktuur op papier sou beslaan. Hy skrywe van jou, in jou. Hy hou jou in Sy hand.

Nes boekliefhebbers van ‘n nuwe boek hou, die ruik van die ink in asem,  so word jy in jou Skepper se hande gehou. Die Outeur is stil tevrede met Sy skepsel.

Jou DNA is so kompak dat dit in ‘n ys-blokkie sal pas, en as dit uit mekaar gehaal en aaneen gestring sou word, sal dit vier keer tussen die aarde en die son pas!
Wonderbaarlik, net in jou liggaam. Net jy.
Kou daaraan wanneer jy minderwaardig voel, as mense se woorde en dade jou ineen laat krimp.
Wonderbaarlik is jou Skepper se liefde vir jou.
Jy is ‘n vaatjie waar in Hy Sy beste, nuwe wyn giet. Elke dag, nuut gemaak.  Om weer jou beste te kan wees. Om Sy hart, oë, ore en hande te wees. Soos Mmusi Maimane onlangs gesê het, bring jou emmer en luister en doen wat God jou vra.
Waarom sal mense se woorde dan nou so belangrik wees dat jy nie kan leef nie? Kan hulle tot die son reik of oral wees?
Maar ook: Waarom kyk jy neer op die bedelaar by die robot? Die ongeskikte taxi-bestuurder? Die korrupte politici?  Die vrou wat nie soos jy leef nie? Jou buurman, jou skoonma, al die mense wat jou dwars in die krop steek?
Hulle DNA  pas ook vier keer tussen die aarde en son.
Hulle Skepper huil, Sy hart breek. Want Hy wil dit nie vir Sy skepsels nie. Al die haat, nyd, onmin, korrupsie, gierigheid en selektiewe omgee.
Tree vir almal en jouself in en bid dat almal ook nuwe wyn in leë emmers gegiet kry.
Wees God se hande, oë, ore en liefde.
Bid en doen.
Dis hoekom ons hier is.

Toortsie se lig skyn raak

Tootsie is ‘n blogger wat raak skyn met haar wyse woorde. Lees hierdie blog-inskrywing van haar oor It’s Time en die onrus in Noordwes…

Onrus

 

Wilde als

africanwormwood

Artemisia afra. Wilde Als. Umhlonyane. Lengana.’n Aromatiese krui. Uniek aan Suid-Afrika.

In Europa is sy boetie Artemisia absinthium, Wormwood, verban. Gebruikers of liewer misbruikers, het erg aan krampe en senustelsel skade gely. Suid-Afrika se Wilde Als is gelukkig anti-inflammatories, antisepties en ‘n anti-depressant.

Dit maak sinusse skoon, raak van wurms ontslae. Dis ‘n kuur vir verkoues, oorpyn, rumatiek, jig, reiniging die bloed, en daar is ondersoek na die plant se vermoë om ‘n impak op tuberkulose te hê. Dit is ‘n pynmiddel. Dit hou vlooie weg. ‘n Wonderkuur.

Vandag het iets gebeur op ‘n plaas genaamd Wilde Als. Net buite Bloemfontein. In die middel van die Republiek van Suid-Afrika.

Dit kan nie in ‘n kiekie vasgevang word nie. Die drie kruise op ‘n koppie, 600 luidsprekers, die logistiek van 200 000 voertuie, vliegtuie,  helikopters en mense te voet.

Duisende en  duisende mense trek op Wilde Als saam. Om te bid. Om ‘n kuur af te bid vir ons land en sy mense.

Toe die oom met die hoed bid, waai ‘n warrelwind stof op. Ek glo net soos die eerste bekeerlinge dat God se hart bly was en Hy met die wind oor die skare, Sy genoeë gewys het.

Kyk: https://m.facebook.com/story.phpstory_fbid=789797927842912&id=255425007946876

Daar het op Wilde Als iets besonder gebeur. Nie ‘n kits kuur nie. Maar miskien die begin van ‘n ommekeer.

Dink net, as ons almal vandag ge-wilde als is, gereinig, skoon gemaak.   As ons more uitreik na mekaar. Nee sê vir dis-respek,  omkoop, gierigheid, korrupsie, selfsug.  Ge-wilde als.  Gereinig. Ontsmet.

Ek is vol hoop, maar my wilde als het luise…

“Wilde Als moet gesnoei word,” lees ek in my kruieboek. Daar is werk om te doen.

Laat ons dan nederig wegstap van Wilde Als, Bloemfontein.

Gesnoei aan ego, eie-belang.

Genesende en geneesde wilde alse.

Vir God Drie-enig, in ons vir jou, Suid-Afrika.

Dis tyd.

Lei ons Here.

 

21 April 2017

OVKRUIS

Ek sit op my stoep. Rots braai, die goggavanger klap, en my Yorkie kou naels agter my rug.

Daar is op hierdie oomblik derduisende mense onderweg na Wilde Als,  ‘n plaas buite Bloemfontein. Berigte kom in dat dit ‘n spesiale plek is. Dana Snyman “voel sag”, ‘n hartsvriendin post drie kruise en sê sy het hoendervleis.

More is die dag wat Oom Angus se oproep “It is time” waar word.

Ek bid dat as die ramshorings blaas, daar reën sal val in die Wes kaap,  dat alle voorpraters van ware demokrasie sal saamstaan,  dat die Republiek van Suid-Afrika tot sy volle reg sal kom.

Dat oral more en deur hierdie naweek, daar mense oral op hulle knieë sal bid en leer nederig en ootmoedig wees.

 

 

 

 

 

 

Meer as ‘n storie, salf vir siele

Image result for karen blixen quotes

So kom ek op ‘n vergete Vuisboek-inskrywing af:  Miskien het God die aarde rond gemaak sodat ons nie te ver in die pad af kan sien nie. So bly ons vashou aan Hom in wie ons sekerste vrede en geluk lê (uit die woorde van Isak Dinesen).

Isak Dinesen, die naam lui klokkies.

Karen Blixen

Eers toe ek in my Kindle rondblaai, tref dit my. Dis Barones Karen Christenze von Blixen-Finecke, kortweg Karen Blixen. Sy van Out of Africa-faam. Haar Afrika-memoir het ons jare gelede fliek toe laat stroom. Onthou julle hoe  snakkend na ons asems het Meryl Streep en Robert Redford se vertolkings ons gelaat?

Out-of-africa_Final-web-kopia__1459323306_213.66.160.50

Hoe dit ook al sy, die talentvolle liriese Deense skrywer, het behalwe die naam  Isak Dinesen, en ook soms onder die name Tania Blixen, Osceola and Pierre Andrézel, geskryf.

Ek het ‘n kopie van Babette’s Feast. Dit is in my geboortejaar gepubliseer. 1958.  ‘n Kort kragtige liriese novelle. Dit neem net oor ‘n uur om klaar te lees. Ek het dit tot gister toe nog nooit gelees nie. Die skrywer se mooi woorde, wat my jare gelede inspireer het, spring vanoggend weer voor my in, en so sit ek gisteraand met ‘n koue glas wyn en lees Babette’s Feast. Rots is in die Bosveld, die honde speel. Lekker my-tyd.

Die boek is een van daai lees, en weer lees belewenisse. ‘n Resensent skryf dat, net soos met ‘n grootse skildery, waar jy telkens met die weer kyk iets nuut ontdek, so is dit met Babette’s Feast.

Ek het nog altyd die geloof gehad, dat daar soveel duisende skrywers is, sodat soveel duisende lesers net die boeke wat vir hulle bedoel is kan lees. Ek is heilig oortuig dat elkeen van ons boeke het wat net  jy in jou leeftyd moet lees. Hulle kry vir jou, wanneer die tyd reg is. Stories net vir jou.

Babette’s Feast leer van opoffering en  genade. Die boek is so oud soos ek, maar hierdie harde week, in hierdie lelike ou wêreld waar ons moet probeer bestaan, was dié boek salf vir my siel.

Doen jouself ‘n guns.

Niks kan ons van God se liefde skei

Stompies

Ons sit by jou roudiens. Die kerk is stampvol.

Verslae en seer sit jou vrou en kinders; jou ou moeder, ineengekrimp van leed; jou stukkende broers met hulle vroue en kroos; familie, vriende en kennisse.

Die Dominee vertel hoe oomblikke ‘n mens se lewe onherroeplik verander. Hoe sy eie broer se dood  in ‘n motorongeluk veertig jaar gelede, sy lewe vorentoe vir altyd ander ingekleur het.

Hy vertel ons van tye in die wêreld se geskiedenis, wat die mensdom vir altyd verander het. WO I, WO II met die atoombomme, 9/11 toe Twin Towers inmekaargestort het, en nou ook in ons struikelende, bloeiende demokrasie.

“Ons het ons onskuld verloor”, tuimel Dominee Groenghoen se woorde deur my kop.

My vriend, het jy dit besef toe jy jou besluit geneem het. Het jy? Die krater wat jou dood in ons midde gaan sink? Die onskuld wat sou verdwyn?

Ek sit so,  en skielik is ek weer by my ma se graf, by Pieterjan se graf, by Louretta se graf. Almal tye waar ‘n ander se oomblik-besluit almal om hulle se lewe in seer hoekoms verander het.

Net toe ek in die hoekom gat wil inval, lees Dominee sy teks. In die middel van die diens. Hy lees uit Romeine 8: 31-39 (1983)

Niks kan ons van die liefde van Christus skei nie
31 Wat is nou ons gevolgtrekking oor al hierdie dinge? Dít: God is vír ons, wie kan dan teen ons wees? 32 Hy het sy eie Seun nie gespaar nie, maar Hom oorgelewer om ons almal te red. Sal Hy ons dan nie al die ander dinge saam met Hom uit genade skenk nie?
33 Wie kan die uitverkorenes van God aankla? God self spreek hulle vry. 34 Wie kan ons veroordeel? Christus Jesus het gesterf, maar meer as dit: Hy is uit die dood opgewek, Hy sit aan die regterhand van God, Hy pleit vir ons.
35 Wie kan ons van die liefde van Christus skei? Lyding of benoudheid of vervolging, honger of naaktheid, gevaar of swaard? 36 Daar staan immers geskrywe:
 
“Dit is oor U dat die dood ons dag vir dag bedreig,
dat ons soos slagskape behandel word.”Vgl. Ps. 44:23
 
37 Maar in al hierdie dinge is ons meer as oorwinnaars deur Hom wat vir ons liefhet. 38 Hiervan is ek oortuig: geen dood of lewe of engele of magte of teenswoordige of toekomstige dinge of kragte 39 of hoogte of diepte of enigiets anders in die skepping kan ons van die liefde van God skei nie, die liefde wat daar is in Christus Jesus ons Here.

Mmusi en die rooi emmer

Image result for Mmusi maimane Planetshakers conference 2017 imagesImage result for red bucket images

Ek volg Good Things Guy op Vuisboek. Hy soek, en kry dikwels goeie nuus, positiewe dinge in en om ons land.

Hy plaas oor die naweek ‘n stuk oor  Mmusi Maimane wat by ‘n konferensie van Planetshakers, ‘n diens gelei het. Ja, voor hy opposisieleier in Suid-Afrika geword het was hy ‘n prediker en is nog betrokke by die Liberty Church.

Planetshakers is ‘n internasionale beweging wat twintig jaar gelede gebore is uit pastoor Russell Evans van Melbourne, Australië se persoonlike ontmoeting met God. Die kern van die byeenkomste is om ‘n omgewing te skep waar ander ook God kan ontmoet deur aanbidding en passievolle prediking van God se Woord. Hulle glo dat elke mens geroepe is om in hulle omgewing uit te moet reik om God se koninkryk uit te bou. Daaruit word drome en ondernemingsgees gebore wat ‘n impak op die wêreld het.  Hulle slagspreuk is:”Empower generations, to win generations.”

Mmusi Aloysias Maimane het ‘n inspirerende, besielde preek gelewer.  Elke Suid-Afrikaner moet die boodskap hoor en ter harte neem.

As jy nie lus is nie om te kyk nie:

Lees oor Jesus se eerste wonderwerk, toe hy en sy volgelinge saam met Sy moeder, Maria, ‘n bruilofsfees bygewoon het.  Die wyn het opgeraak. Die gasheer fluister sy kommer aan Maria. Maria gaan heen en gee die kelners opdrag,:”Wat ook al Jesus vir julle sê om te doen, doen dit!”

Nie lank nie, of Jesus gee hulle opdrag om ses water vate van klip vol water te maak.

Joh 2:8 – 10 ABA: “Toe sê Jesus vir hulle: “Skep nou van die water en gee dit vir die hoof-kelner!”  Hulle het die water vir die hoof-kelner gegee.  Die hoof-kelner het geproe dat die water wyn geword het. Hy het nie geweet van waar die wyn kom nie, maar die kelners wat die water geskep het, het geweet. Die hoof-kelner het die bruidegom geroep en vir hom gesê: “’n Mens moet eers die goeie wyn vir jou gaste gee. Later, wanneer die mense baie gedrink het, gee ‘n mens die wyn wat nie so goed is nie. Maar jy het die beste wyn gebêre tot nou toe!”

Mmusi Maimane het die teks voorgehou. Hy en ‘n rooi emmer op die reuse verhoog.

In kort het hy vertel dat ons soos vrolike gaste kan wees, en vir ‘n paar dae praat oor die lekker troue met die goeie wyn op die einde, en dan na ‘n rukkie doodgewoon met ons lewens aangaan, asof niks gebeur het nie.

Of ons kan maak soos die kelners, en gehoorsaam, “wat Jesus vra, doen.”

“Wees emmerdraers, en op die ou einde deel aan wonderwerke! Net een woord van Jesus, en hulle gehoorsaam. Voor dit was daar geen wonderwerke nie.”

Maimane vra die vraag: “Wat dra jy?”

Haat, bitterheid, swaarkry en negatiewe dinge is ‘n emmer met dooie gewig. Dit bring niks goeds mee nie. Sal jou net afsleep na nog swaarkry en seer.

Ons moet lewegewers word. Ons moet met oortuiging na God to gaan met ons emmer vol hoop en planne vir ‘n beter wêreld – in jou omgewing vir beter skole, strate, huise.

Jesus het die water in die vate in nuwe wyn verander, omdat mense geluister het wat Hy vra.

Kom met jou emmer vol hoop, luister wat God jou vra, en doen wat Hy sê!

As jy self wil hoor, luister en raak besield:

http://www.daystar.com/ondemand/legacy-video/?video=5395539744001

Volg die Good Things Guy op Facebook vir inspirasie en goeie nuus: https://www.facebook.com/goodthingsguy/

 

Koda kou hier, daar oral tot in my hart.

“Ma, ek het ‘n hond gekry. ‘n Labrador-Pitbull kruising. Sy naam is Koda, dit beteken vriend in sommige tale.”

“Ma, Koda is te besig vir die woonstel – hy vreet alles op. Ek het hom by die gehoorsaamheid skool gehad, hy is baie slim. Kan hy maar by julle kom bly?”

So kom bly ‘n woelige reus by ons. Gitswart en besig. Besiger as Patricia wat my Bybel opgevreet het, tafelpote gekou het en rondgeloop het. Baie besiger as Pippie die hoendervanger. Albei op die ou end deur kwaadmense geskiet.

Hy is pas ‘n jaar oud en weeg meer as dertig kilogram. Hy het die tafelpoot verder gekou, die stoeptafel ook bygekom.

Ek koop toutrek speelgoed – hy haal dié uitmekaar, hy het my kelim ‘n hoek uitgevreet. Ons raas, ons speel, en lyk soos self-skenders in die proses.  Hy teister sy bejaarde maats. Dit gaan knor-knor. Rots raak moedeloos. “Sy naam moes Koudaar gewees het”, brom hy

Hy klim op my skoot, wis nie hy is groot nie – ‘n baba in ‘n reus se lyf.  Lê op die ottoman  asof botter nie in daai bek kan smelt nie. Kom vra om op die bed te kan uiltjieknip. Kerm soggens wanneer ons koffie drink om by ons te kom lê. Leer saam met ou Rufus vir beskuit vra.

Kyk vir jou met sy  bruin oë. Toor met ons.

“Hy is baie stout.”

“Hy is onopvoedbaar.”

Nee, en nee!

Want sien sy naam beteken eintlik: Mamma se jongste witbroodjie!

Bab het die regte naam gekies, met die verkeerde betekenis.

M   last born mothers pet …   (Africa)
Male
Friend to everyone     (Sioux)
Een van die dae is hy twee, dan gaan die dinge van ‘n baba verby, ek kan altyd ‘n ander mat kry, of nie. Maar vir Koda – ons het net hierdie een beurt. So my Koda moet nou maar raas, raas klaar kou en woel, want een van die dae is hy my groot witbroodjie brak!

Soveel meer as affodille, paasbolle en kerrievis.

easter2017

Paasaffodil

Wat beteken Paasfees en al die Paasfees simbole vir jou?

Vir my is dit veel, veel meer as ‘n langnaweek, paashase, paaseiers en padsterftes.

Ook veel meer as affodille, paasbolletjies en kerrievis. Daar is egter vir my en my geliefdes diepe betekenis agter die simbole en gebruike gereserveer vir die Paastyd.

Christus, die Visserman, die Leermeester, die Koning van konings het Sy lewe vir ons geoffer, en uit die dood opgestaan sodat Hy vir ons ‘n Nuwe Hemel en Nuwe Aarde kan gee!

Affodille dui op hoop en nuwe groei. Jesus maak dit moontlik. Daarom is ek altyd kinderlik bly wanneer die mini-affodille op die blommerak verskyn, dit herinner my aan ‘n besondere geloofstyd aan’t kome.

Ons berei oor Paastyd gepekelde vis, sodat ons herinner kan word aan die asyn wat Jesus gekry het, toe Hy aan die kruis gesê het:”Ek is dors.”

Die paasbolletjie herinner my aan Jesus se belofte dat Hy die Brood van die Lewe is, en ook dat hy Sy lewe geoffer het om ons sondes te delg. Die kruis op die Paasbolletjie herinner my aan die opstanding op die derde dag van ons Heiland en Heer. Die dood is oorwin!

Hosanna, hosanna roep ek saam met die skare. Red ons,red ons! En Hy het, en Hy doen en Hy sal!

Paastyd is nie die enigste tyd wat ons moet opsy sit vir Jesus nie – elke dag is ‘n vernuwing. Elke oggend as die Here ‘n nuwe dag skenk, kan ons nuutgeskep leef, want Jesus het vir ons ewigheid opgestaan!

Ek lees tans ‘n boek, “Forgotten Jesus”. Wat ‘n besieling om te leer van Jesus en die tyd waarin Hy geleef het. Jesus, die Joodse Rabbi, Jesus na wie daar in die hele Bybel na gewys word. Deur Adam en Eva, deur Abraham, deur Isak, deur Dawid, Daniël en Elia. Jesus staan die hele Bybel vol.

Lof vir die boek: “By uncovering the teaching of the first and second century rabbis and Christian theologians, and highlighting little-known Jewish idioms and traditions, Gallaty takes Christians on a biblical journey to rediscover a forgotten Jesus from a biblical perspective, deepening your relationship with God.”

My asem is weg. My hart klop warm – God het Sy storie geskryf vir my en vir jou, oor eeue heen! Onbeskryflike genade en liefde.

Kyk ook hier:

Adelaide se “Sheet cake”

20170415_110153

Dit is Paasnaweek 2017 se Saterdag. Rots en ek hou vrottiedag.

Ja, ek sit nog in my pajamas hier en skryf. Ons het flink opgevlieg en self vrieskas skoongemaak, want dié lyk soos ‘n rooilighuis op ‘n Saterdagoggend.  Jy weet, lekker deurmekaar en oes.

Ons het brekfispap met lewer en niertjies vir laatoggendete geniet. Vir ons vyf brakkekinners bederf met pap en Montego-sous. Ons almal se magies span so styf om die lyf. Dit het weer begin reën, na gister se 40mm.

Ek is dankbaar bly vir so baie seëninge, en wil vir my Rots verras. Iets buite my geaardheid doen. Ek wil koek bak. Dis raar, glo my.

Die resepboek val oop by Adelaide se sheetcake.

Kom ek vertel:

My skoonmoeder, Biebs, was ‘n flukse, flinke, vietse vrou. Uit haar twee hande is liefde in borde kos, fyngebak, koekies, beskuit en nog baie meer opgedis.

Sy het elke kind se voorkeure geken. Tot haar skoondogters. Daar was niks lekkerder om skelm met ‘n eetlepel die bak gestoofde perskes in die yskas te beroof nie. Asof sy nooit geweet het ek doen dit nie.

Vir die een boet is daar altyd Dirkie kondensmelk in die yskasdeur. Vir die ander, biltong en droëwors in die broodblik. Vir ander witkoek.

My skoonma vang my met Bab se vierde verjaardag uit. Sy kry die kitskoekmengsel se boks in die asblik.

“Skaam jou,” verwyt sy my, die beroepsvrou skoondogter. Ek stotter en lag maar, en sê Bab kon Nommer13 by die tuisnywerheid se koek gekry het. Ek het darem eiers geklits, en gemeng en die oond aangesit.

Die boksiekoek word ‘n groot spottery. Sy giggel en praat van sheetcake wat ek bak.  “Ma, jy praat lelik met daai vroom mond”, spot ek terug.

 

 

Nie lank na Bab se verjaardag, kom kuier Biebs weer vir ons. Sy bring vir my ‘n resep – Adelaide se sheetcake.

Ek was gewip. Het hom net so in my resepboek geplak. Nooit gebak nie.

Dis nou jare later lê die resep voor my oop, en my skoonma is al vyf jaar nie meer by ons nie.

Ek mis haar, my skoonma. Ons twee het aan mekaar geskuur tot ons mekaar se “ek het jou”-plekke mooi gemaak pas het.

My skoonma, my ma. Ek is lief vir haar. Sal altyd wees. Sy het my veel langer as my eie ma geken. Sy het my hakieshart verstaan.

Biebs, die sheetcake resep werk mooi. Jou seuntjie laat weet die kinners op WhatsApp dat die antie sheetcake bak, en dit reën en reën. Is dit jy wat lag dat die hemel so oorloop? Lief jou.

NS. Die resep werk so goed soos Biebs gesê het. Een smeriger lekker is by die skakel te vind:

http://thepioneerwoman.com/cooking/the_best_chocol/

DSC_0202

 

 

Jesus al Een

Op die Skedelberg,

arms wyd gesper en vasgenael,

hang Hy vir ons sondes.

Sien Hy wyd en ver en vir ewig, 

deur dors,  pyn, alleen? 
Alleen.

Tussen hemel en aarde. 

Sy Vader wenend, met Sy rug weggekeer,

en die mens starend na die kruis.

Alleen.

Niemand hoor die laaste sug.

In die tempel skeur die afskorting oop.

Steeds is daar vrees en onbegrip. 

Selfs drie dae later, 

by die graf,

oopgeruk.

Ongeloof.

Thomas moet eers sien

Voor hy glo.

Uit verlatenheid, 

uit die dood, 

kom belowe

Jesus, Seun van God,

ons sal nooit alleen,

verstote,

vol sonde bly.

Hy het alles, vir ewig

reeds betaal.

Vir jou en my.

Jesus.

Al Een.

Hosanna!

My Gorrel

Vaste woorde vir los gedagtes.

Forgotten Magic: Lifestyle blog

Muffins, Coffee and this Blog

Dis Ekke

My vreugdes en frustrasies

toortsie.com

Skyn, liggie, skyn!

Life according to C

To become remarkable, hold yourself accountable

Holladriehoe

Hier gesels ek oor alles wat my bly maak: my taal, die natuur, kuns, die lewe.

Top40Weekly.com

The Weekly Top 40 1955-2017

No Facilities

Random thoughts, life lessons, hopes and dreams

Leeskring met een lid

Waar ons boeke saam met die seelug inasem

The Bee Writes...

oder auch "Die Bea schreibt" *** expect nothing... not even the unexpected *** erwartet nichts... noch nicht mal das unerwartete

Gedigte wat jou laat dink.

Sien die groot prentjie.

I♥2CR8

a.k.a. Toekloshe

Kluisenaarsklaviere

Denke oor die wêreld, sy plekke en sy mense. 'n Afrikaanse blog.

Kameel se gebabbel

Waar die hart van vol is, loop die mond van oor

Kruger Theron

Stories met Siel

Daily Manna

By Heart of Worship

Justice's Blog

The fear of the LORD is the beginning of wisdom...The contents of blog ranges from Christian knowledge to my own 'nerdy' posts.

The Depth of Now

Exploring Istanbul Through Storytelling & Photography

Discover

A daily selection of the best content published on WordPress, collected for you by humans who love to read.

Wag 'n Bietjie

Welcome! Come linger a while..

The Sanity Rules

Uncommon common sense

Tannie Frannie

My terapie vir oudword

Ouch!! My back hurts!!

Life according to one of life’s truly gifted naturally born wafflers… an open diary of a Saffer in a different land... life in the greater Dublin & Leinster area. (Since 2011) My quests fuel my dreams… my dreams fuel my quests!!

Liewe Persoon

Ons het almal iemand nodig om na ons te luister

Bondels Gedagtes

Lesse geleer, en stories uit my lewensreis

penpunt

Waar die hart van vol is …

Country Living in Southern Africa

Sharing my life in Mozambique and all things country in Southern Africa

Dream Desire Achieve

The dreams you desire can be achieved, for with God nothing is impossible.

KAITLIN B. CURTICE

Kaitlin B. Curtice

de Wets Wild

Disappearing into South Africa's wild places... Again!

heart prints

live the story you want to tell

filosopete

blessedbeyondrecognition 🇿🇦

WoordNoot

Waar ek my woorde en note kombineer om my storie te vertel

Die Bordkryt

Studentekoerant

Positief

Wat jy in jou gedagtes toelaat, dit word jou lewe

Ekmyselff

dit is wat dit is, ek is ook wat ek is

'n Skrywer se blok

Kortverhale, gedigte en die lewe.

Thulana

Almal om my is gek...

Vinke en Verse

Spraak-, taal- en gehoorterapeut. Kamma-digter. Lewenslange student. Reisiger. Liefhebber van woorde, musiek en Afrika. Deur Genade gered en deur Liefde vrygespreek.

Tapestry of Thought

Cilnette Pienaar weaves and unravels