Ek lees dié raak en dink aan springmielies en mense.

“Give me the discipline to stop moving and, instead, listen.” Die skrywer het dit oor ontwikkeling in mense. Ek wil byvoeg “…and wait.”

Al te dikwels lees en luister en neem ons aan gesprekke deel nie om ander te hoor nie, maar om te reageer, om self gehoor te word.  Soos rasende bonsende springmielies in ‘n pot. Ongeduldig, onrustig en soms plein ongeskik.

As springmielies sonder ‘n deksel gespring word, is dit die wêreld vol. ‘n Gemors en bron van irritasie.

Springmielies wat te gou die pot ontsnap bly ‘n harde mieliepit, niemand gaan jou geniet nie. Kruidjie-roer-my nie is nie te gewild nie. Jy kan maar sê “so gemaak, so laat staan”, dit maak jou nie oulik nie.

Daar is altyd springmielies wat nie uitpof nie, al die hitte en olie in die wêreld kan nie hulle doppies laat skiet sodat hulle lieflike geur en smullekkerte geniet kan word nie.

Mense is ook so. Daar is nie keer aan hulle nie, en dan as ander van hulle wegdraai kan hulle al springend en skreeuend nie verstaan hoekom nie.

Iemand moet springmielies dophou. Die hitte beheer, net genoeg olie in die pot sit, die mielies net lank genoeg laat spring, weet wanneer om die deksel te lig, net genoeg sout te gooi. Springmielies kan dit nie self doen nie.

Nie almal is springmieliemakers nie.

Ek gaan nooit ophou probeer om die beste springmielie-wat-ek -kan-wees, na te streef nie. Meer geduld, geloof, vertroue en vreugde, want ek weet wie die Springmieliemaker is.

“You don’t take the heat off the pan of popcorn the second the first kernel pops. Nope – that is when you start shaking the pan up and keeping constant heat on. That first sign of progress isn’t the end. It’s just the beginning”- Chelsea Fournier

Ek hoop mede-springmielies, die gewilliges en onwenniges, sal hande vat en saam transformeer. Daar is plek onder die deksel en sorgsame oog van ons Maker, vir almal. En ons het mekaar nodig in hierdie vreemde tyd.

Ek het maats wat op die oomblik nie te lief vir my en verandering is nie. My ou springmielietjies, ek deel graag die wyse woorde en my bede is om julle aan die ander kant van omwenteling te kry en dat ons sal groei.

Every friendship travels at sometime through the black valley of despair. This tests every aspect of your affection. You lose the attraction and the magic. Your sense of each other darkens and your presence is sore. If you can come through this time, it can purify with your love, and falsity and need will fall away. It will bring you onto new ground where affection can grow again.”
― John O’Donohue, Anam Cara: A Book of Celtic Wisdom

Sela