#ToeValLig

Dis Kersdag. Vroeg. Sonopkomtyd. Die Watervalbende hol uitbundig die huis uit. Buite pêrelskulp die nuwe dag te mooi.

Die kakelaars klink soos ‘n alternatiewe jazz band wat ‘Die Heiland is gebore’ aweregs pleeg. Lieflike loflike nuwe dag. Die dag wat ons die koms van die Lig na die wêreld gedenk.

Ons Bron van krag en wysheid en vrede in ‘n wrede, woedende en ekkige wêreld.

Gister op Oukersaand sak die son. Deur die blinders val ‘n skag lig op ons Advent aftel blikboom. #ToeValLig. Ons harte klop warm. Dis so gepas. Die Lig van altyd en ewig se koms ons terwille is mos wat ons vier. Wat ookal ons omstandigheid.

Vandag is daar eerste en laaste Kersdae. Daar is afstand tussen geliefdes, daar is hartseer en pyn. Woorde wat ongesê bly, vergifnis wat weerhou word. Iewers wag ‘n ma alleen op die klop aan die deur wat nie sal kom nie.

In ‘n sinkhuis grom honger magies. ‘n Vrou kyk na haar stukkende gesig in die spieël. ‘n Dogter lê beangs en bid dat die deurknop nie sal draai nie. In Kherson maai Russiese bomme mense by ‘n kersmark af. Mag ons Heiland en Redder oral troos, uitkoms en vrede bring

Mag daar waar jy is Lig skyn. Ek bid vir liefde en vrede en vreugde. Mag dit deur klomp #ToeValLig oomblikke om jou skitter.

Geseënde Kersfees en allesbeste vorentoe.