Strome van seën wat sag op die sinkdak pittepatte maak my vroeg wakker.

Die wêreld om my slaap, my geliefdes en viervoetige kinders elkeen met hulle drome besig.

Met sonopkom giet daar 5mm uit die reënmeter. Ek bid vir Anne se Oos-Kaap en oral waar reën na gesmag word.

Dis koel bewolk en luivrou skons voel net reg om die liefies mee te bederf.

Wyl ek bak en die verrassing berei, bid ek dankie vir huise waar mense so saam sal wees soos hier op Waterval. Geborge, geliefd en geseën.

Ook dink ek met seer aan die wat vandag honger, seer, bang en alleen moet deur. Ag Heer, maak alle eina mense van U liefde en genade bewus.

My huismense kom soek koffie en die honde kaperjol en hol van blywees almal is wakker vreugde.

Die huis is deurspoel met RSG en Magdaleen Kruger se puik speellys vir vanmore se Loof die Heer.

Sir Harry Secombe sing Ode to Joy. Ek gooi sommer uit pure vrolike vreugde my arms in die lug en dans om die tafel. Luister saam en mag julle ook vreugde in klein dinge en in julle lewens en om julle tafels beleef. Groetnis