Kom, kom sit vir oulaas op die stoep. Ons moet maar biekie hard praat, stoele is so meter van mekaar. Moenie komkommer nie, die tee is van die goeie soort met gemmer en allerhande goete, en ek het ‘n masker en handskoene aangehad. Biekie ontmettingsmiddel vir jou? Hier is die snesies. Kom ons kuier gou.
Hier op die plaas leef ek al drie jaar sosiaal gedistansieër. Julle weet mos. So hierdie ‘lockdown’ ding is vir my nogal iets om te aanskou as reeds eenkant mens.
Ek voel egter ook soos ‘n kind wat nie so lekker vir die eksamen geswot het nie. So hollerige kol net so tussen my hart en naeltjie. Daai een wat nie met kos of lafenis wyk nie. Sien ek is op my flippen senuwees om Rots en Bab 24/7 vir 21 dae om my te hê.
Ons weet nie meer hoe om heeltyd in mekaar se geselskap te wees nie, al is ons lief vir mekaar, al bly ons saam, is elke liewe Maandag tot Vrydag se agt daglig ure myne. Myne en die Watervalbende en die gevolgeltes wat veilig by my woon. Ek hoef nie te smaail nie, praat min, dink baie, doen wat ek wil. Loop in my pajamas en bad eers 14h00.
Nou berei ek voor vir 24/7 x 21 se naweekgoed: ‘Ma, wat gaan ons eet’, ‘wie gaan help met skottelgoed’, ‘die honde moet gebad word’, wie pak die uitstallings van leë goed en gebruikte goed oral op my kombuiskaste op en smyt goed nie in die flippen asblik nie. Sewe dae ‘n week. Ek weet nie of my gemoedsbekak pil sy werk gaan doen nie.
Ag jinne, kom ons los nou eers kommerinsse, julle sal nou die petalje geniet. Ons en Eishkom het nie net die loadshedding verhouding nie. As daar weer op daai Elders plek van die berigte opsteek, dan sal daai bliksemstraal mos nou ‘n reële hier by ons omtes traak slaan en uitbrand. So sukkel ons vir amper 72 uur verlede naweek om Eskom tegnici te kry om die halwe fase krag toevoer reg te stel. Die ligte flikker, die yskas motors kla, dan sit ons alles af, dan is die generator op diens, dan gaan die krag aan, en so foeter ons aan.
Rots en sy nefie is baie lief vir keur boerewors. So het ons net nou die dag, voor die corona aanslag en omwentelinge, ons winter voorraad bestel. Lekkerste wors van Wegsteek Slaghuis, mooi verpak, vir ons en vir nefie kom hier op Waterval aan. Die spul wors word in die kis vrieskas verpak, saam met my meel goed en spaar brood – want ons bly op die plaas. Dis maar hoe mens beplan.
Gister wil ek brood uithaal en ek maak die kis vrieskas oop. Die brood is ontdooi, die vrieskas motor is kisboude, kapoet! Kan jy nou jou verbeel met soveel raap-ape wat winkel rakke leeg stroop, hoe lyk dit as mens op Dag Zero in die dae van Corona, ‘n nuwe kisvrieskas aankoop?
Rots het met ‘n kep laag oor sy gesig en ‘n hoody en sonbril, die aankoop gaan doen. Ons twee Lekker kinners gaan met die Lekker lorry plaas toe kom asof hulle ‘n aflewering van ‘n braai doen. Flip, kon dit nie maar ‘n grassnyer of die stof suier gewees het was die gees gee nie? Ja toe, lag jou maar ‘n papie! Ek giggel al sedert gister aanmekaar.
Ek dink aan julle terwyl ek beet kook. Die huis ruk na ster anys, kardemom en koemyn. Benewelend lekker. Ek bid vir almal se veiligheid terwyl ek die kruie tuin natspuit en die geur van roosmaryn, suurlemoen verbena, salie, tiemie, wilde als en basiliekruid soos ‘n gebed na bo sweef.
Wees veilig, wees bedag om die duiwel nie spasie te gee nie. Wees nadenkend oor jou menswees, wees goed vir jouself en jou geliefdes. Was jou hande, kom veilig anderkant uit.
Terwyl ek stukkende vrieskas uitpak, lag ek oop bek, omdat ek raap-ape en hulle selfsug so vreeslik aardig vind. My hart breek vir die bejaardes, alleen mense, armes, weerloses vir wie hierdie vreemde dae en siekte sekerlik soos oordeelsdag en die hel lyk.
Ek is dankbaar dat elke gesin in ons sorg reeds veilig tuis is, met kos, moetie, ontsmettingsmiddel, geld en die versekering dat ons daar vir hulle is.
My hart is seer oor familie en vriende wat nie meer met ons praat nie, wat nou gebede en versies omstuur. Mag daardie bruggies maar weer gebou word en oorgesteek word as ons mekaar weer kan witoog.
Sterkte en liefde aan elkeen.
Ek sal later weer kom inloer.
Naskrif:
Hoe om nie ’n koronadoos te wees nie.
1. Bid, maar plaas jou vertroue in die wetenskap en was jou hande. Jou geloofsoortuigings skeld jou nie kwyt van die virus nie. WSJD? Waarskynlik jou gemaan het om jou hande te was. ‘Cleanliness is next to Godliness.’2. Nee, Gertruida, Woolworths bly nie oop sodat jy elke dag vars ciabatta, croissants en bloubessies kan koop nie. Koop in grootmaat, gaan net winkels toe as jy iets dringend benodig. Vries maar daai ciabatta-broodjie.
3. As jy dit kan bekostig, betaal steeds jou huis -en tuinwerker. Hulle salarisse onderhou dikwels meer mense as wat jy dink. So help jy om die ekonomie aan te gang te hou, bestry armoede en doen ’n goeie daad. Bid ook vir jou werkers, maar nog beter, betaal hulle.
4. Moenie fopnuus versprei nie. Piesangs gaan jou nie teen Covid-19 beskerm nie. Om met heuning, asyn en warm water te gorrel, ook nie. Korona kruip nie weg in sojasous nie en jy kan steeds jou gunsteling-soeshi restaurant ondersteun. Maar net tot Donderdagaand…
5. Moenie ’n rassis of dweper wees nie. Die virus is ons almal se probleem, die feit dat dit in ’n mark in Wuhan, China ontstaan het, is blote toeval. Gaan kyk bietjie na die impak wat sondebok-soek op Jode tydens die builepes en gay mense en MIV-Vigs gehad het.
6. Hou asseblief jou kinders ver weg van ouma en oupa af. Hulle kan Skype. Nee, ouma is nie ’n kinderoppasser in die tyd nie. Al bied sy aan. Al dreig sy en raak moeilik. Dis die aard van Boomers, om stil te sit tydens ‘n krisis druis teen hul Calvinistiese beginsels.
7. Luister vir Cyril en bly by die huis. Dit beteken binne die vier mure van jou eiendom. Nee, jy mag nie met die hond gaan stap nie.
8. Moet asseblief nie al die toiletpapier en whiskey opkoop nie. Deel.
9. Ek weet die telge raak rusteloos, maar liewe ouers, probeer asseblief om hulle volumeknoppie af te draai. Ons werk tuis en dit klink gereeld asof hier ’n rituele offerhande met kinders en katte in ons straat uitgevoer word. Ek het gehoor Allergex-stropies werk.
10. Was jou hande, bly by die huis en bly kalm. En wees bly Cyril is jou president.
Spotprent: The Philadelphia Enquirer.
Ek sit op die stoep saam met jou en deur die kuberruim gee ek vir jou ‘n stywe drukkie. Soos iemand op FB vandag sê: “Duisende vroue met cabin fever en 21 dae om n lyk weg te steek. Wat kan enigsins verkeerd gaan?”
LikeLike
Net so, ons gaan kreatief wees. Baie liefde en drukke. Ek bak en kook en fie nuwe vrieskas sing mooi. 🤗😉
LikeLike
‘n Vrou wat ‘n boek sit en lees waarvan sy hou, beplan nie ‘n moord nie. Plasie se lockdown raad aan die harige spesie is: Koop vir jou vrou boeke, baie boeke. Dit verhoed cabin fever en is goed vir jou gesondheid. Bedank my later.
LikeLike
Geseende en gesonde 3 weke daar by julle!
LikeLike
Het nou so lekker gekuier hier op jou stoep!
LikeLike
😷☕💝👋
LikeLike
Ek lief ook my stoep en kuier graag daar. Ons kan maklik ‘n tyd afspreek, tee maak en “saam” op ons eie stoep tee drink…
LikeLike
Wat van 21 stoepkuiers op Rebusfontein…..
LikeLike
Jaaaaaa,ek het nogal gedink dis die idiale tyd om te verdwyn soontoe..
LikeLike
Dan moet ons voor 24h00 pak en gaan…..
LikeLike
Jys reg, laat ons wikkel
LikeLike
💝✏📚🧹
LikeLike
Die lewe loop maar sy loop. Party dae gaan dit goed en dan weer nie te goed nie. Tog oorleef ons nog. Ek voel ook baie jammer vir die huis en blyplekloses. Waar gaan hul heen.
Jul moet ook maar vasbyt en met tye uit mekaar se hare bly.
LikeLike
Ek is scrapydo2
LikeLike
💝📚✏👋😷
LikeLike
Wens ook ek het liewer Rebusfontein toe gegaan. Die ding van die vrieskas het my net laat kopskud. Murphy’s law – dit sal in hierdie tydperk gebeur.
LikeLike
So soek ek twee dae voor in grendel suurdeeg by die supermark, die rakke is leeg. So vra ek manlief, ” wat weet die mense wat ons nie weet nie, maak hulle ń doepa vir Covit19 of wat?” Groot is my lag toe ek gister op RSG hoor, dit is aangekoop vir bier maak. Ek wou net brood maak😱😥. Gelukkig darem 3 pakkies gekry by derde plek.
LikeLike
Pragtig geskryf soos altyd. 💞 Ek voel asof ek saam met julle almal op die stoepsit.
LikeLike
Ag ek het jou eers bietjie kom soek hier, ek mis jou skryfsels.
Hierdie inperking maak my lam.
Ek mis my oudste seun, hy bly net 40 minute van ons af maar in ‘n ander provinsie, so ons mag mekaar nie sien nie. En hy is alleen. Sonder tuintjie of hond of kat of vis of voël of maat. In sy woonstel. Op die derde verdieping. So ek verlang my dood en is baie bekommerd oor hom.
LikeLike
Sterkte daar ook… en nee, moenie dat hulle jou Maandag tot Vrydag vryheid weg neem nie… maak lysies vir hulle… steek dir op die yskas vas met hul take… al is die taak net om vir ma aleen te los!!
Mooi bly – goeie gesondheid vir julle almal!!
👍😉😁
LikeLike
Veilig wees daar by julle ook. Ons besigheid maak darem 4e oop.
LikeLike
Starkte… hoop alles het goed gegaan vandag!!
LikeLike