Dis lekker bewolk hier op Waterval. Meer as twintig dae laas iets gegriffel hier in Blogland. So hier en daar ingefladder om te loer wat my maters aanvang en beleef.
Smaak my die wrede Janoworrie met sy 999 dae het maar oral haar hou ingekry, of miskien is dit net my bril wat skeefgeslaan is en my skryfmuse die verskiet laat in vlieg het.
Ek dink nie ons moet langbeen teen die muur sit nie. Die weer, jy weet. Die skroewe in my rug voel roeserig. Kom ons sit soos beskaafdes by die ou tafel op die stoep. Ek sal vir ons ‘n tee skinkbord dek. Lekker Karoo heuningbos, vars gebakte brood, regte botter en vyekonfyt. Dis waarvoor ek lus het.
Die swaeltjies wat nuwe nes net so skuins bokant ons koppe gebou het (want flippen goggas het in hulle vorige huis ingetrek), moet julle nie pla nie. Hulle het net een kinnerkie vanjaar. Ons noem hom Pernoeps, hy is so bietjie simpel of moedswillig. Kan om die dood toe nie daai nes waar hy soggens uitvlieg, vanaand binnegaan nie. Sy ouers sit op die vensterraam agter my en saam moedig ons hom elke middag aan as hy met wye aanlope die nes benader en net voor hy die ingang kry swenk hy weg, elke middag. Miskien speel hy, ek weet nie.
Het ek julle van die Desember hael vertel? Op 19 Desember is die Lekker winkel toe, personeel is weg tot Jan-o-worrie vir Kerstyd en Nuwejaar, my huis is splinterskoon – matte gewas, gras gesny, swembad skitter. Ons Desember tuis rus breek aan. BAb is weg dis net Rots en ekke en die brakke op die Watervalwerf.
20 Desember breek aan. Ons is rustig. Dis egter baie bedompig en die weer bou op. Teen 12h00 is daar wolke, pikswart en kwaai en groot raas. Sweerlik is ‘n Ming vaas deur stouterds omgestamp en raas word in die hemel uitgedeel – erg.
‘n Rukwind trek oor die werf, ons hol om vensters en deure toe te maak, en toe val die reën en die hael. Die platdak het nie verweer nie, die geute verstop. 45mm reën en hael in 12 minute is ‘n oorstroming onder die dak sink in op die plafonne.
Rots en ek staan met groot oë vir mekaar en kyk. Water loop teen kombuis mure af, dit loop teen my kamer muur af en ook op die plafon nate langs. Dit drup op die beddens, stoele, dit loop agter boekrakke in. Ag jinne. Ek smyt net handdoeke en badmatjies oral neer. Ons probeer met skroefrug en stywe nek beddens en stoele skuif. Skilderye red. Dis ‘n gemors. Kort en kragtig, 12 minute se chaos.
Buite het die tuin ook nie te goed gevaar nie. Plante is stukkend, stukkend geslaan. Selfs my nuwe vetplantjies op die stoep is geklits. Arme bougie wat met haar rekverband nog aan die vorige rukwind se beserings herstel se koppie met nuwe groeisel staan geboë, kaalgat geslaan. Ag en ja, die mooi grasperk en skoon swembad is omskep in ‘n mynveld van palmtakke, palm skedes, jakaranda takke, wewer en vink nessies en stukkende blare. Geseënde feestyd se voet.
Goddank ons het lankal ophou sakke sout vreet. Ek sweer ‘n baba huwelik sou nie die gemors gemaak het nie. Daai jong egas so pad af deur die modder wou hol. Ons het maar so vir mekaar gekyk en begin opruim. Net ons twee.
My asem slaan weg toe ek in my kamer kom. Ek is bederf met ‘n lieflike Hanlie Kotze vir die 61e verjaardag. Die oorspronklike werk het in plastiek gesnoes op die boekrak langs my bed gestaan. Ek het skoon vergeet.
Flip, toe ek die kosbaarheid optel, kom ek agter, water her wragtig ingeloop. Nat is die onderkant van die moet-nog-geraam-word kuns. My hart het byna gaan staan. Dank Vader my geliefde kunstenaar is met niks minder as die beste tevrede vir haar skeppings nie. Die papier is sterk en haar werk ongeskonde en effe voetlangs gekreukel. Dis darem nou veilig terug van die raam en mooimaak winkel. Ek het benoudsweet van my voorkop gevee!
Nodeloos om te sê het ons ou tweetjies die volgende twee dae ge-Spasmend en ge-DeepHeat en maar stil geblokraai. Uitgeput.
Na die maniese skrop en skoonmaak en benoud Desember deur uit vrees dat ons plat dak nie nog so trauma sal hanteer nie, loop 2020 ons met so spoed binne dat ek en seker klomp ander mense rekmerke het.
Die kapelaan op RSG se oggendiens vanmore het dit vertel. Ons het miltsteek, want Jan-o-worrie het sommer voort gestoom en hier sit ons nou in Skrik(kel)-Fe-bru-worrie!
So besef ek vanmore hoe ek van die skryf en kommunikasie kar afgebliksem het en uitasem in die stowwerigheid bly lê het.
Gelukkig, gelukkig kom mens seer-seer tot jou sinne. Ek het darem nie soos ‘n jammer kry varkie in die stof lê en seer troetel nie. Die tuin is herstel. Die plante staan soggens by die agterdeur en wag om te hoor waarheen hulle verplant gaan word.
Die wewers en vinke se nessies is herbou, slim ook. Julle moet sien hoe hulle nou nessies om blare aan die punt van die soepele witstinkhout se nuwe lote vasanker. Die wind kan maar kom.
Ons Lekkerwinkel se slim manne het hulle ma kom red en die dak het ‘n lekker vasmaak en seël sessie gehad. En so het ek begin op kyk en om my kyk en gister loop my geliefde Graaff-Reinet se dam vol! Ja, tot my hartsplek was seer en droog.
Genade onbeskryflik groot. Alles gaan verby en ‘n nuwe dag breek aan en miltsteek verdwyn.
Is die lui huisvrou se uitbundigheid nie aansteeklik nie! Baie beter as die coronavirus.
So, daar het jy dit nou. Nog ‘n koppie tee, dan vertel jy my hoe dit gaan!
Ek groet nou, moet onverwyld saam met Harpy my Towerinmaats op Rebusfontein, ‘n kluisenaar raaf ‘n les gaan leer.(Klik op die skakel en lees lekker aan ons nuutste avontuur.)
NS. As jy kans kry. Gaan soek Coenie de Villiers 2.2 CD. Hy en Judith Sepuma en die Mzanzi Jeugkoor sing Amazing Grace. Dis sielblom mooi!
Lekker saamgekuier, sjoe dit was wild.
LikeLike
Verstaan jy, rekmerke en miltsteek het nou eers gewyk.😉
LikeLike
Kan net glo! Jammer jong, pas jou mooi op.
LikeLike
Welkom terug Vuurtjie ek het jou gemis in blogland. Dit was ‘n wilde sessie wat jy baie grasieus oorleef het. Knap gedaan
LikeLike
🤗💝
LikeLike
Jou muse is terug, hoera! Hoe lekker om by jou teetafel te sit en luister hoe jy en Rots die wilde Afrika-weer te bowe gekom het ❤
LikeLike
Dit rammel en raas nou elke dag en nou is ons dankbaar vir die reën.
LikeLike
Hier is reen so volop, ek wens altyd ek kon daarvan aanstuur na ons eie land.
LikeLike
Ek het nou so lekker saamgekuier. Baie dankie. So jammer vir al die hael verniel. Hoewel ons seker beter af is as die vulkaan en aardbewing ouens, bly dit maar skade. Hoop die res van die jaar sien ons meer van jou.. Nie dat ek kan preek nie. EKself is baie baie sleg met die blog deesdae.
LikeLike
💝🤗
LikeLike
Bly vir die reen, jammer van die hael.
LikeLike
Ons is baie dankbaar
LikeLike
Dis lekker om jou weer hier te sien. En goed om te hoor dat jou kunswerke die waterstryd oorleef het.
LikeLike
Die nuutste een het nou ‘n storie.
LikeLike
Dis baie oulik, daardie een van Hanlie Kotze.
LikeLike
Asof sy my ken.🤗
LikeLike
Solank jou muse terug is, glimlag ek diep tevrede. Ek het jou mooi vertelle SO gemis!
LikeLike
💝🤗
LikeLike
Sorry vir die skade maar ek het die beskrywings nou geniet
LikeLike
Na die oorlog kom opruim. Die tuin is spiekeries en die water val op Waterval, nie meer deur die dak nie.😉 Dankie dat jy kom inloer.
LikeLike
Dankie tog jul het nie die coronavirus by julle nie. Die weer het darem goed vir julle ore aangesit. Dankie dat jy weer geskryf het. Het jou gemis. Dit voel of almal van my vergeet het. Ek verstaan egter dat die krag en waterprobleme baie kere die oorsaak van al die stilte is. Hope liefde daar vir jou en die brakke.
LikeLike
Ons praat nie oor krag nie…. maar ek bid elke dag vir al my Towerinmaats, en is baie lief vir julle almal. Sal my bes doen om meer te doen as net inloer en like. Mwah!
LikeLike
Ek worrie ook maar oor alger want ons loop al n lekker lang pad saam.Jy is ook ekstra kosbaar vir my.
LikeLike
Het nie lekker opvangs hier op ‘n plot in Polokwane nie. Het op jou link vir kluisenaarskrywe gedruk… sien niks op Linknetz nie. My fout?
LikeLike
Ek het nog nie klaar geskryf nie🙈Harpy en Alexander laat my draaie vlieg.
LikeLike
Oe! Dis so lekker om jou weer te lees. Jammer oor al die skade, maar dankbaar jy is saam met ons in SkrikkelFebruarie!
LikeLike
😉🤗💝
LikeLike
Sjoe, klink na ‘n rowwe tyd wat julle deurgemaak het! My muse is ook morsdood, maar sal seker weer haar kop een of ander tyd oplig.
LikeLike
💝🤗🌻
LikeLike
Ja… daar het ek dit nou… maar, as ek mag vra… ek laaik nie tee nie, mag ek maar ‘n ou glasie rooi druiwesap deel daar oppi stoep? 🤣🤣
LikeLike
Enige tyd. Merlotjie?
LikeLike
Hoe lyd dit met ‘n lekker ou SA asyntjie? Pinotage? Ek is besimpled oor die goed hier in Ierland! Vat my huistoe!! 🍷😁🍷🤣🍷
LikeLike
🍷🍷👍
LikeLike
Jy is deur baie. Ook ek sukkel om te skryf. 2020 het rof begin. Maar hierdie is pragtig en inspirerend.
LikeLike
Dankie dat jy kom kuier het. Bly dit het vir jou sonskyn gebring🌞🌻
LikeLike
Lekker en nou het ek sommer Hanlie Kotze ontdek ♥
LikeLike
Hallo, dankie dat jy kom inloer. Ek is mal oor haar kuns en woorde! Groetnis.
LikeLike