Ek is gek oor beet. Heel, in blokkies, in skywe. Vervreet my as ek die sappige purper rooi gekookte sfere afskil. My hande is gekleur want daar is niks lekkerder as om so beet in jou hand vas te vat en die skilletjie kom so los en juweel mooi kom lê die kaal blink knol in die bak. Kyk hoe mooi lê my kooksel in die erdeskottel met die lieflike sonskyn lig besprinkel!

My gunsteling manier van beet kook is met baie sout, steranys sommer so handvol, wonderpeper korrels en kardemom sade wat gekneus is. O, en gooi so lepel canola olie ook by, anders kook die spulletjie lekker morsig persroooi op die stoofblad oor. Daai moet nie veregete bly nie.

Terwyl die beet lekker op die stoof kook en hemelse geure die huis oorspoel, sny ek met die mandolien dun, dun uie in ringe, en maak hulle los en lê dit in appelasyn, net so dat hulle bedek is om te ‘macerate‘ (sag maak) soos die foodies ons leer.

Terwyl ek so berei, hoor ek my Bab as kleuter bid aan tafel: “Hier is my kossies voor my Heer…(ek vergeet hoe die gebedjie gaan) ..vir koek en eier, bloedrooi beet, perske, peer, dankie Vader sê ek weer. Amen

Haar klokhelder kinderstemmetjie bid so deur my gedagtes by die beet bak. Ek is seker God onthou elke woordjie wat sy so geprewel het, en Hy ken my gehakkel met die frases wat ek onthou. Dis vir my lekker om so te stamel bid terwyl ek die beet skil en dan ook papierdun ronde skywe mandolien.

Dan word die uie en asyn so bo-oor gestrooi en ligweg deur gemeng, om dan vir so dag of wat stil in die yskas bly tot die uie verdwyn in die purperrooi. Lekker, lekkerte. So oud soos die aarde self.

Beet was aanvanklik ‘n plant wat aan die kus gegroei het. Dis een van die oudste voedselsoorte vir menslike gebruik. Assiriesse skrywes circa 800vC vertel dat beet in die Hangende Tuine van Babilon verbou is. Dis egter die ou Romeine wat beet behoorlik op ‘n troontjie geplaas het.

Ken jy die storie van Aphrodite en beet? Daar is nogal wilde getuienis oor die sensuele kragte van beskeie beet gevind op muurskilderye in die ruïnes van Pompeii!

Die storie is dat Aphrodite, godin van die liefde, beet verorber het om haarself nog meer onweerstaanbaar te maak. Kos-geskiedskrywer, Tori Avey, vertel dat die ou Romeine, beetsap as opkikker gebruik het! Nou ja toe, wie het viagra nodig, as die ou beskawings al reeds ‘n antwoord gehad het, wonder ek.

Beet het hoë inhoud aan boor, ‘n mineraal wat hormone help produseer en ook die immuunstelsel verbeter. Dit bevat blykbaar ook isobutyl methoxy pyrazine. Ons mens neuse ruik klaarblyklik konsentrasies van die unieke molekule onder die gedeelte per triljoen vlak – een van die mees stimulerende reuk samestellings op aarde. Dit is ook wat Bell pepers hulle unieke reuk gee. Bedwelmend!

Ek lees dat Aphrodite dan ook nie-amptelik die godin van beet is. Die Orakel van Delphi het blykbaar verklaar dat beet hulle gewig in silwer werd is. Dis nou naas radyse (horseradish), voorloper stimulant in mistieke vrugbaarheid.

Daar is ook bygelowe dat as sou ‘n man en vrou saam ‘n beet eet, hulle op mekaar verlief sal raak. Mmm, almiskie moet daar liewer beet op Vaaltyndag uitgeruil word…

Die geloof kom van die legende rondom Aphrodite, en dat die beetknol nogal na ‘n hart, die universele simbool van liefde, lyk.

Wonder ek nou, is my en Rots se gesamentlike liefde vir beet die rede vir ons 34-jaar vir botter of wors lewe saam? Ek weet nie van die vurige doepa deel wat aan beet toegeskrywe word nie, ek weet net ons harte is al lankal een!

Robuust soos Russe wat borscht verorber, of Nore wat glo beetsap maak hulle so wys en geïnspireerd soos hulle god Kvasir of die mitologie wat vertel beet maak jou so wulps soos Aphrodite. Wat ookal, elke diertjie sy plesiertjie.

Ek lief beet – ek proe die goedheid en rykheid van ons skepping in elke hap. Aards, vol smaak en geur. Goedheid vir jou hart, bloeddruk, ryk aan vesel, vir stamina en energie, om inflammasie te beveg. Dis net pleinweg njammies. Gekombineer met die reuk van steranys, kardemom en sagte uie – hemels.

Hopelik jy voel ook so oor beet, of kyk met nuwe oge na die knolletjie, oral op aarde in mense se dieet!

Gaan lees self meer: https://en.wikipedia.org/wiki/Beetroot

NS. Sou jy vergeet van die beet oordaad vandag, volg daai aaklige skrik more-oggend as jy die troonkamer besoek!