More Here.
Dis Vuurvliegie hier. Ek wil asseblief by U voete sit vir meer as ‘n wyle. Ek wil eintlik op U skoot sit, of onder U kleed se soom inkruip en net daar bly.
Maar eers wil ek dankie sê. Dankie Vader vir die mooi weergawe van ‘Baba Yethu.’ (Ons Vader in Swahili) deur die Maties koor onder leiding van Andre van der Merwe. Ek loop dit raak op my gunsteling blad Kissing Fish raak. So met ‘n ompad.
Die mooi stemme van die Suid-Afrikaanse koor laat my liggie sommer helder wil skyn. Alle nasies en volke, loof die Here.
Maar Here, my hart is baie swaar en seer en bekommerd vanmôre. Polokwane is alweer in die nuus. Niks goed nie, niks opheffend nie. Nee, iets afgryslik.
Hoërskool kinders, 12 tot 15 jaar oud, van ons stad het soos diere, ‘n jong man, Thoriso Themane in die straat toegetakel. Hy is geslaan, geskop. ‘n Video opname is gemaak terwyl hulle hom aanval. Hulle gil en hits mekaar aan terwyl hulle die bebloede, beseerde man straat af sleep. Die skoppery en boewery hou vir etlike blokke aan. Die jong man is Sondag eers gevind. Hy is dood.
Maandag by die skool, spog een van die belhamels dat hy nie bang is nie, sy pa is ‘n hooggeplaaste in die regering.
Here, my hart breek, my siel walg. Hoe word kinders sulke monsters? Hoe maak jy iemand dood, sommer so.
Ek ween vir ‘n lewe kortgeknip. Na alle bronne, ‘n goeie siel, geliefde kind en broer.
In ‘n hiëna trop vasgeloop en met sy lewe geboet.
Here, laat geregtigheid vir hom geskied. Al is dit hoe swaar, bid ek ook vir die kinders wat die tragedie veroorsaak het. U vereis dit van my.
Laat die kinders so buite beheer besef dat hulle voor U sal moet bely. Dat hulle gedrag en houding nie in U raadsplan val nie. Ek bid vir hulle siele Here. Ek bid vir ons siek land en samelewing. Hierdie kinders se gedrag ‘n simptoom van die onmenslikheid wat ons opvreet.
Ek lees vanmôre dat dit U enkelvoudige wil is dat die wat na U draai deur U Seun, Jesus, die ewige lewe sal erf.
Baba Yethu, mag ons almal met Jesus, na U draai, met ons ewige verblyf in U teenwoordigheid immer in die oog.
Vergeef ons.
Ons weet nie wat ons doen nie.
Tel elkeen met hulle seer op U skoot, vou hulle toe in U arms.
Dankie vir my beurt Here. Dat ek by U liefde ontvang en moed kan kan skep.
Amen.
*****
Ons gemeenskap is ontstemd deur die gebeure.
Ek stem met die jong vrou saam.
Skokkend….veral omdat kinders is, is dit nog erger.
LikeLiked by 1 person
Ek is stil vanmore – dis vreeslik. Die jong man was op pad huistoe van ‘n kerk byeenkoms. Blykbaar mode vir die jong kinders om in bedwelmde bendes in die omgewing rond te hang.
LikeLike
Maak mens naar op jou maag…
LikeLike
Ai dis so hartseer. Ek huil, bid en raak stil saam met jou vuurtjiexx
LikeLike
Vir sy lewe, sy mense, en die siek jongmense, die ouers en ons wêreld….
LikeLike
Ja ek stem, so sinneloos
LikeLike
Dis verskriklik hartseer, wat gaan van hierdie land word as kinders so optree?
LikeLiked by 1 person
Dis nuut-bevoorregte kinders…dis soos die Waterkloof insident, maar erger…
LikeLike
Ek voel dieselfde…dis die nuus wat ons lees vroeg in doe oggend. Mens het nie woorde nie…da
LikeLiked by 1 person
Dis absoluut verskriklik!!! Daardie meisie se boodsksp moet orals gehoor word.
LikeLiked by 1 person
Dis vreeslik.
Weereens sidder ek om te dink watse volwassenes hierdie “kinders” gaan word? Ek was net so onsteld met die 13-jarige wat so week of wat gelede haar eie lewe geneem het oor boelies. Nou wil hulle vir die boelies berading gee na die tyd, maar hulle kon vir haar niks doen nie, selfs nadat haar ma by die hoof was. Ek raak briesend, veral omdat my jongste op ‘n stadium onder boelies deurgeloop het. Jy het so goeie hart, want ek kan nie eers dink om vir sulke “kinders” te bid nie. My hart is koud vir hulle.
Wat gaan van ons word?
LikeLike
Dis ‘n wrede wêreld en soos ek onlangs by Toorts ook opgemerk het. Die wêreld het te veel mense met regte, maar niemand wil verantwoordelikheid neem nie. Daar toe Spock begin vertel het kinners moenie meer slae kry nie…daar het dinge begin uitrafel as jy my vra.
LikeLiked by 1 person
Ja ek stem 100% saam jou. ‘n Pakslae het niemand al gedood nie. Maar ja, ons leef in ‘n wereld waar kriminele meer regte het as wetsgehoorsame burgers, so wat anders verwag mens eintlik?
LikeLike
Ek het nie woorde nie. Dit maak my naar en hartseer tegelyk. Mag die Here gou terugkom dat die naarheid op aarde kan ophou.
LikeLiked by 1 person
Dis onbeskryflik hartseer en siek. Ek en Scrapy het net vanoggend daaroor gesels en ek was van mening dat ouers deesdae bang is vir hul eie kinders. Wat gaan van hierdie geslag word? Ons is besig om monsters groot te maak.
LikeLike
Dis ironies wat die ‘privilege’ waaroor so tekere gegaan word, die wortel van kwaad is. Hierdie is Waterkloof 5 herhaal…..
LikeLiked by 1 person
Dit maak dit veel erger. Ons leer eenvoudig net nie uit die foute van die verlede nie.
LikeLike
Jesus het ons voorberei op wat gaan kom….maar die werklikheid daarvan is ‘n nagmerrie. Wens God wil nou ‘n streep trek….Finish!!! Dankie tog ons kan by Hom gaan sit ❤ en ons hart uitpraat.
LikeLike
Dis hartbrekend erg, ek staan in afgryse, hoe gebeur sulke dinge? Dis so sinneloos. Ons kan net bid vir genade, dat Jesus sal kom skoon was hierdie verharde wrede harte.
LikeLiked by 1 person
Hy is gister begrawe en daar is nou al 4 volwassenes en ses kinders arresteer. Hulle verskyn more in die hof.
LikeLike