Jy wil wat?

Ek het ‘n nuwe leefrooster. Stukkie vryheid vir myself en die maal van woorde en stories wat immer deur my gedagtes vlinder, bewerkstellig. Dinsdae en Donderdae is bly alleen tuis dae. Die gesin gaan vort om ekonomie te pleeg. Ek klim vroegoggend in my grot (boekery, skryfplek, dinkplek) – my eie kamertjie waar die ander in die huis se twakkies wat nie in die kakkieslaai pas nie, en belangrike dokumente mooi in die ingeboude kas weggesteek is. Die res is my droomspasie.

So kom sit ek Dinsdagoggend vir die groot nuwe begin. Ek gaan skryf oefen en pleeg. My in woordstringe verlustig. Watwou.

Die heelal vra suikerbekkiesoet en tong in die kies:”Jy wil wat? Kyk eers.” Gehoorsaam  is ek dadelik. Uitstel my hoofbedryf. Ek staar by die venster uit.

Voor my lessenaar staan ‘n wildepiesang bos en ‘n  ‘Delicious Monster’. Die jasmyn het lankal die twee opgetooi en naby sing die swembadpomp. Hierdie is die suikerbekkies van Waterval se paradys. Hulle is gewoonlik hierdie tyd van die jaar mals gedrink aan jasmynnektar en geniet ook die jakaranda wat pers in die blom hemel toe reik. Maar dis anders vanjaar. Die jasmyn is amper klaar geblom, die jakaranda bloeisels lê uitgewas-lila op die winterdroë grasperk.

So, my eerste skryfdag tuis maak ek twee bottels suikerstroop aan en hang dit by my venster vir die fraaie juweeltjies. Ag, aan skryf is daar min gedoen. Die getjirp en vlieg by die venster het my vir ure vasgenael gehou.

Lieflik, loflik kom sing hulle hulle vreugde hier by my uit. Geseënd is ek.

Hoe kontant, die bottel hang aan my venster, en dié outjie op die foto is die baas van die nuwe smulparadys. Hy verjaag ander, net sy vroutjielief mag saam kom drink.

Toe skryf ek vanoggend vir julle, my dierbare blogvriende, en myself.

Sophia my storiekakrakter wat al agt jaar gelede haarself by ‘n wasgoeddraad aan my kom voorstel het gil hier in my agterkop en Janieskryf wag al ‘n jaar vir werkstuk ses. Ek moet nou gedissiplineerd wees. Anders is daar ‘n moord in my binneste.

Ek gaan nou die wel van woorde as my suikerstroop gebruik en ook my energie benut om met woorde te sing soos my nuwe gevlerkte vriendjie!

Baai!