Rots en ekke is instaan-oupa en -ouma vir twee liefiekindertjies, Boeta en Milamuis. Hulle verryk ons lewe. Op die oomblik is ons harte seer. Ons fraai dogterjie het “hip displasia” en om dit reg te stel moet die kleine lyfie geopereer word, en dan volg weke in gips vir die klein woelwater. Hulle vertrek vandag na die groot stad sodat kundige sorg verseker is.

Ons het Woensdagaand gaan groet en liefdesoene gee. Nou, ek is op die oomblik doelbewus in skrywe-afsondering. Aankope vir die huis en inkopies oor die algemeen is Rots se werk, hy gaan daagliks ekonomie by die lekker- en kunsmiswinkel ekeonomie pleeg.

Oupa Rots koop toe mos nou vir ons twee kindertjies ‘n lekkerte en speelding. Baie trots word die tweetjies bederf met hulle verrassings.

Ag, julle. Ek skater nog aaneen sedert Woensdag. Hy haal daar uit die inkopie sak twee Kinderjoy eiers en twee sulke plat pakkies. Een het ‘n kleine pienk seeperdjie, die ander ‘n blou akkedis.

Mielie, die kinders se ma en ek is verstom. “Bring ‘n bak water,” kom die opdrag.

“Die goed vergroot to 600%,” vertel Rots.  Boeta is die ene entoesiasme. “Hulle gaan groei,” sê hy bekkig.

Ek neem die verpakking. “Um, julle. Hierdie goed vat to 72 uur om uit te sit…” Swanger grootmensstilte volg. Boeta en Mila staan vasgenael voor die bak water. Ons loer met onderdrukte glimlagge vir mekaar. Hier is moeilikheid.

Ons kuier en speel, en immer is die bak water in die gedrang. Uit desperaatheid het Boeta en Mila naderhand hulle ma se Tupperkas leeg. Al wat ‘n Lego blokkie in water, staan oral rond. My arme Mieliekind. Jammer dat ons nou tipies Oupa en Ouma, chaos veroorsaak.

Dis vanoggend so 36 uur later. En ons kry dié foto’s! Bwahaha! Die goed het nog so 400% om te gaan. Ag ja! Ons gril en Boeta is in die wolke! Mila, het haar ma se grimering in die hande gekry. Mila het lankal van die groeimonsters vergeet.

Ek bid vanmore dat alles vir Milamuis goed sal afloop en dat haar Mamma en Pappa en al die regte oumas en oupas saam met haar die swaar tyd in groot geloof sal deurmaak. Dankie Here, dat U saam met ons stap, elke oomblik, elke situasie en met groot liefde. Bewaar ons dogtertjie en dankie dat volkome herstel vir ‘n vol lewe vorentoe die uiteinde van die tydelike seer is. Dankie dat U ons deur groei en seer en kommer altyd naby is. Bewaar ons dogtertjie deur monsterseer en verwarring. Dankie dat haar Mamma deurentyd by haar sal wees, dat hulle albei deur liefde omgewe is. Dankie dat hierdie bang en onseker ook sal verbygaan. Amen.