Wanneer verandering plaasvind, hetsy in die wêreld om jou of aan jou binnekant – jou emosies of uitkyk, ervaar mens maar ‘n gevoel van magteloosheid. Ek dink dis soos Dorothy in die Wizard of Oz gevoel het toe die tornado haar in Kansas opgesuig het en in Oz uitgespoeg het. Daar waar jouself skielik in ‘n woeste vorteks bevind. Jy weet deur hierdie chaos moet jy kom, oorlewing ter wille. So, na my mening is baie Suid-Afrikaners in ‘n skaamkwaad-woede of vingerwysende-dis-jou-skuld vorteks vasgevang. Ons beter anderkant probeer uitkom.
Ons land se mense is oral moerig, kwaad. Dis rerig asof die ketel gaan droogkook en uitbrand. Soveel wreedheid en moordlus. Soveel korrupsie en anderpad-kykery. Soveel moddergooiery. Soveel dubbelstandaarde en argumente. Die pers radiostasie is op die oomblik die kersie op die koek.
Ja,Tumi het tekere gegaan. Maar wraggies hoe sy in die middel van wie verteenwoordig Afrikaanses nou – die sanger of die uitgewekene in Nederland – beland het, gaan my verstand te bowe.
Ek sweer ek het in ‘n paralelle wêreld na ‘n ander radiouitsending geluister.Dis hartseer dat ons so gou op sosiale media reageer en vure aanstook.
Die analogie wat Tumi gebruik het, of wat ek in die ander radio-uitsending gehoor het, was dat Apartheid (nie witmense nie) se gevolge is soos ‘n boelie wat uitgehaal word omdat hy iemand se fiets gevat het. In plek van straf vir die boelie, word die benadeelde kind aangesê om die fiets met die boelie te deel. Dis wat ek gehoor het. Ek dink dis nogal ‘n goeie analogie.
Wat ek ook gehoor het is dat Tumi dink mense in hulle nou persoonlike perspektiewe, baie soos die rondloperbok is wat op die ou einde aan ‘n paal vasgemaak word om sy gewoonte te breek. Die bok loop daarna al in die rondte en net so ver as wat die riem hom toelaat. Hy raak so gewoond aan sy sirkeltjie, dat wanneer die riem verwyder word, sal die bok aanhou om in die aangeleerde paadjie te beweeg.
Ek is Afrikaans, wit, middeljarig. Ek hét uit Apartheid gebaat. Kon middernag in die strate rondjol as student, is ‘n goeie opvoeding gegee, kon gaan studeer, kon doen wat ek wou. Nes duisende ander soos ek.
Ek hou nie van Steve Hofmeyr – die middeljarige weergawe nie. Hy is vir my opsweperig Dis maar ek. Ek hou ook nie partikulier van Martin Bester (te nasaal) of Rian van Heerden nie (probeer te hard). Ek hou van Tumi as sy nie so skel lag nie. Ek mis vir Diane Broodryk – sy het styl gehad. Ek hou baie van Amore Bekker en Marieta Kruger – hulle bedryf mooi Afrikaans vir my. Maar dis ek, ek verwag niemand om my opinie te deel nie. So blaas maar so 10 bar af toe!
Ek hou nie van die Prez en klomp politici van verskeie oortuigings nie. Ek hou ook nie van Orania-denkers nie. Dis my keuses en voorkeure – al die laaik en ek-laaik-nie. Maar dit gee my nie die reg om liederlike dinge te skryf of ander mense af te kraak en in die massa soos ‘n gogga te kere te gaan nie. My opinie word reeds hier nou te veel na my smaak gelig.
Hier is die ding – mense is erg opgesweep. Hier in Polokwane sou Martin Bester van die pers radiostasie kom optree namens ‘n plaaslike diereversorging-organisasie. Onthou sulke besprekings word byna ses maande voor ‘n optrede bespreek. Hoe sal die hondeliefhebbers nou kon raai wat op 12 September – twee weke voor hulle konsert sou gebeur. Die moerigheid oor wat mense dink hulle gehoor het, het nou veroorsaak dat die konsert gekanselleer is, met vieslike kommentare op die arme welsynsgroep se Vuisboekblad.
Nou wonder ek so in my enigheid – bereik hulle enigiets om die konsert te boikot? Vra hulle, hulle kaartjiegeld terug van die hondebeskermers? Gaan hulle vrywillig (die gesiglose hulle wat so tekere gaan) hulle R100 kaartjies in skenk om die brakke te help. Wed jou NEE.
Lekker in ons moerigheid, word ons presies soos diegene wie vere voel vir reg en geregtigheid in ons land. Die hulle is ons, julle! Tyd om te besin oor uitsprake, te luister met kalm en oop gemoedere en mekaar die hand te reik en saam deur die storm kom!
Wens ek kon soos Dorothy my hakkies klik en alles kom reg.
Net so.
NS. Lees hier oor woede.
https://aeon.co/essays/there-s-no-emotion-we-ought-to-think-harder-about-than-anger
Lekkervurigeaffêre 
Ek hou van wat jy hier skryf. En ek stem met meeste van jou stellings saam.
LikeLike
Bly dis meeste waarmee jy saamstem.
Ek is so keelvol. Plaas ons werk om verskil te maak, maar nee. Die swere moet oopgekrap bly en bloei en stink.Pfft.
LikeLiked by 1 person
Ek hou ook van dit wat jy skryf. Die wêreld soek sensasie en elke ou las ‘n stertjie aan elke storie en dit lyk my ons dink almal ons moet Jerry Springer gaste wees vandag. Hoe meer bizarre, hoe beter. Ons kruip weg vir die regte issues om saam die stroom te gaan. Min wetende dat daai stroom reguit in die verderf in op pad is. Eish
LikeLiked by 1 person
Dana Snyman het nou net op Vuisboek ‘n satire van almal se gebrakery moes verwyder oor mense nie kon verstaan dat hy kritiek lewer nie. Jo!
LikeLike
Dana Snyman het nou net op Vuisboek ‘n satire van almal se gebrakery moes verwyder en oorplaas oor mense nie kon verstaan dat hy kritiek lewer nie. Jo!
LikeLike
Ek is so moeg vir die alewige bakleiery en uitskellery. Ek wil net my kop in die sand steek.
LikeLike
Ek het ook nie raad nie….
LikeLiked by 1 person
Ek hou van hoe jy dink
LikeLiked by 1 person
Ek deel nogal jou sentiment rondom baie goete… in skaamte moet ek sê ek is een van die’s wat op, het jy gehoor, reageer het… nou wonder ek… ek moet dalk eerder stilbly aangesien ek Radio Kansel en Impact Radio luister en dus buite my beurt afgegaan het. Ek dink net, veral die Afrikaner, is so vuisvoos dat hulle al automaties oorreagger sodra dit by enige verskil kom, ongeag of dit rasgedrewe is of nie is nie. Skaam kry ek nou vir myself….
LikeLike
Ek stem so saam met jou! Ek lees dikwels berigte op sosiale media, en teen die 5de persoon se kommentaar voel ek sommer naar en omgekrap oor mense se aanmatigende, ongepoetste en pleinweg ongeskikte uitsprake. Daardie “holier-than-thou” troontjies waarop hulle sit en die hele mensdom beoordeel (mmm, daar doen ek dit nou seker ook!) Die haat-spoeg oor ongeregtigheid wat “ons” aangedoen word, terwyl “ons” onsself superieur ag bo ander.
Ek is wit, ek is Afrikaans en ek is ‘n Christen, maar wanneer sommige mense dit die maatstaf van hulle “ons” maak, wil ek in hoofletters antwoord: Los my uit julle “ons” uit!
LikeLiked by 1 person
Daai wat jy skryf is nie ‘n lieg nie. Ek hou nie van mense wat uitlatings maak en daar word aanvaar dat, omdat ek wit is, ek daarmee saamstem nie. Moenie namens my praat nie. Al my kliente is swart en daar is alewig wrywing tussen hulle dan tune ek hulle net: “We don’t do politics here. We do business here. WE, remember – WE!”
LikeLiked by 1 person