Vanoggend spring hierdie pos van verlede jaar op die Vuisboek uit.
6 Julie 2016
Die geskel in die nuus oor ander se foute en misstappe laat my rondkrap in bêregoed om te ontvlug. Ek kry dié waarheid wat my skoonma 31 jaar gelede met my gedeel het. En ek besef ek het immer harde geloofsoefening nodig. Geloof is nie gimlidmaatskap nie! Jy moet elke dag opdaag, want daar is altyd iets wat uit die oefening sal baat, meestal my siel.
Kon dit net sowel vandag weer pos, dink ek by myself, niks het verander nie, maar tog het alles verander.
6 Julie 2017
Vandag is ook die dag wat my selfmoordma se verjaardag sou wees. My Sussie pos vir haar ‘n verjaardagkaartjie. Ek wil vandag hier vir haar skrywe:
Liewe Anna Malat,
Dankie dat jy my die wêreld ingebring het. Dankie dat ek baie geleer het, in die kort tyd saam met jou en Pa en Swartjie. Dit was kort en kragtig, jou ouerskap en lewe.
Jy is vir ewig jonk en mooi saam met Marilyn Monroe, James Dean en Pa. Hierdie foto is my gunsteling, dis net al verdof.
Swartjie en ek is al jare ouer as julle. Die tyd se aanstap wys om ons oë en monde, maar nie te erg nie – julle genetiese geskenke is nie te sleg nie – “We wear it well….”
Ek is lankal nie meer hatig kwaad vir jou nie, het so ruk gelede besef jou pad was joune, en my pad is myne.
Elke mens het maar lewenswerk om te doen en om te leer sodat ons oopgebreek en as volgroeide selwe voor God te kan staan, elkeen alleen.
So ek kan vandag op die dag wat ons jou meer as ander dae voor oë hou, se ek is lief vir jou, ek mis jou teenwoordigheid op die pad voor my. Ek mis die wete dat my ma vir my bid, ek mis dat jy nie jou kleinkinders, en veral my meisiekind kon sien nie. Dat jy kon beleef hoe dit voel om ‘n stukkie van jou die toekoms in te sien stap.
So ja, mis mis ek vir jou – my ma.
En soos die Onse Vader wat ek elke dag oor moet leer bid, vra ek vergifnis vir my kwaad en seer, en ek vergewe jou. Die grootste besef is dat my seer te make het met hoe ek gekies het om jou dood te hanteer, nie regtig met jou as mens nie. Sjoe.
Die Serdep help vir die gevolge van my keuses.
Sê groete vir Pa en Ouma Stomp en Oupa Faan, Oom Ben en Hennie.
Heelgelapte liefde
Rina
NS. Op jou verjaardag luister saam….
Lekkervurigeaffêre 
Wat kan ek nou vir jou sê. Selfmoord los ons met ń ‘ander’ gevoel, een wat nie regtig verwoord kan word nie. Jy het nou weereens vrygespreek, dis goed so. Ek wonder of jou mamma nie sou sê sy is jammer nie. Jammer dat sy julle net ‘gelos’ het. Ek sou graag in die gap wou staan en dit vir julle sê. Want as ń mamma-mens wil ek graag vir jou iets gee. Op hierdie dag.
LikeLiked by 1 person
Dankie vir jou dierbare en diepe meelewing. Jy hoef nie jammer te sê nie – as haar pad se laaste kronkel nie so was nie, het ons nie hier gesels nie. Ek hou aan die besef vir heling vas en dank God dat woorde ryg my aan soortmense bekendstel, woord vir woord. Dankie travel460!
LikeLiked by 1 person
“Die grootste besef is dat my seer te make het met hoe ek gekies het om jou dood te hanteer, nie regtig met jou as mens nie.” Dis iets wat ek ook ter harte moet neem. Dankie dat jy gedeel het.
LikeLiked by 2 people
Dit het my jare geneem, die vryheid wat saam met die besef gaan is ‘n seëning.
LikeLiked by 1 person
So mooi die besef dat elkeen van ons se pad ons eie is, en dat ons juis baiekeer oor ons eie pad diegene om ons vergewe vir dit wat vir ons dalk nie reg en eg gelyk het in ‘n ander se pad nie. Jou ma was beeldskoon mooi, en ek love die feit dat jy haar as forever young ervaar. Xx
LikeLike
Ek het nou so lekker na die liedjie geluister. Ek het ‘n vriendin wie se ma ook self besluit het dis klaar. En dit bly vir haar ‘n rou wond. Ek wens sy kon met iemand soos jy gesels. Maar ek dink nie sy is reg om te luister nie.
LikeLiked by 1 person