Stompies

Ons sit by jou roudiens. Die kerk is stampvol.

Verslae en seer sit jou vrou en kinders; jou ou moeder, ineengekrimp van leed; jou stukkende broers met hulle vroue en kroos; familie, vriende en kennisse.

Die Dominee vertel hoe oomblikke ‘n mens se lewe onherroeplik verander. Hoe sy eie broer se dood  in ‘n motorongeluk veertig jaar gelede, sy lewe vorentoe vir altyd ander ingekleur het.

Hy vertel ons van tye in die wêreld se geskiedenis, wat die mensdom vir altyd verander het. WO I, WO II met die atoombomme, 9/11 toe Twin Towers inmekaargestort het, en nou ook in ons struikelende, bloeiende demokrasie.

“Ons het ons onskuld verloor”, tuimel Dominee Groenghoen se woorde deur my kop.

My vriend, het jy dit besef toe jy jou besluit geneem het. Het jy? Die krater wat jou dood in ons midde gaan sink? Die onskuld wat sou verdwyn?

Ek sit so,  en skielik is ek weer by my ma se graf, by Pieterjan se graf, by Louretta se graf. Almal tye waar ‘n ander se oomblik-besluit almal om hulle se lewe in seer hoekoms verander het.

Net toe ek in die hoekom gat wil inval, lees Dominee sy teks. In die middel van die diens. Hy lees uit Romeine 8: 31-39 (1983)

Niks kan ons van die liefde van Christus skei nie
31 Wat is nou ons gevolgtrekking oor al hierdie dinge? Dít: God is vír ons, wie kan dan teen ons wees? 32 Hy het sy eie Seun nie gespaar nie, maar Hom oorgelewer om ons almal te red. Sal Hy ons dan nie al die ander dinge saam met Hom uit genade skenk nie?
33 Wie kan die uitverkorenes van God aankla? God self spreek hulle vry. 34 Wie kan ons veroordeel? Christus Jesus het gesterf, maar meer as dit: Hy is uit die dood opgewek, Hy sit aan die regterhand van God, Hy pleit vir ons.
35 Wie kan ons van die liefde van Christus skei? Lyding of benoudheid of vervolging, honger of naaktheid, gevaar of swaard? 36 Daar staan immers geskrywe:
 
“Dit is oor U dat die dood ons dag vir dag bedreig,
dat ons soos slagskape behandel word.”Vgl. Ps. 44:23
 
37 Maar in al hierdie dinge is ons meer as oorwinnaars deur Hom wat vir ons liefhet. 38 Hiervan is ek oortuig: geen dood of lewe of engele of magte of teenswoordige of toekomstige dinge of kragte 39 of hoogte of diepte of enigiets anders in die skepping kan ons van die liefde van God skei nie, die liefde wat daar is in Christus Jesus ons Here.

© 2007 Bybelgenootskap van Suid-Afrika. Gebruik met toestemming. Alle regte voorbehou.

NIKS, niks kan ons skei van God se liefde nie, want Jesus  het reeds al ons mens-foute en sondes op Hom geneem, Homself in ons plek gestel, gesterf, die dood oorwin en Hy sit by God en doen vir ons voorspraak, nog voor ons ‘n woord uiter.

Dominee haal ook net hier die blinde sambok uit. Want sien, die rasperbekke, die  alweters, die wat soveel weet dat hulle by jou was toe jou laaste oomblik aanbreek, het op Vuisboek en in mekaar, en selfs in die wat nie wil weet nie, se ore, hulle menings en opinies uitgedeel. Die wonde van hulle woorde ongeag. Die van hulle wat by jou diens gesit het se ore het gebrand, wees verseker.

Dominee maan ons almal dat niemand kan oordeel of jy hier of daar of waar ook al beland nie, want ons almal skiet tekort . Net God se genadige liefde red ons, want NIKS kan ons daarvan skei nie. 

So vriend, ek glo jy is sonder pyn, veilig, geborge en gelief. Ook so my Ma, Pieterjan en Louretta.

Ons, ons hier, gaan nou eers huil, kwaad wees, rou en wonder, want ons is mense. Jou geliefdes gaan leer om sonder jou voort te leef, en ook met jou besluit leer saamleef.

Ons kan egter ook vashou aan die feit dat NIKS, maar niks ONS van God se liefde skei nie. Daarom sal daar krag en genesing en aanvaarding kom.

So al voel ons nie nou so nie, rus ons ook veilig, geborge en gelief aan die Vader se hart.

Tot wedersiens.

Amen.

NS. ‘n Vriendin wat nie weet dat ons vandag jou roudiens bygewoon het nie, sy ken jou nie, stuur uit die bloute die sonsondergang foto op WhatsApp vir my.

Hemels mooi. Niks kan ons skei van God se liefde nie.

Toe skryf ek vir jou om te vertel van vandag en om te sê tot wedersiens.

IMG-20170418-WA0008